El Plenu de la Xunta refuga la enmienda a la totalidá a les cuentes presentada pol PP

|

Los grupos parlamentarios na Xunta Xeneral del Principáu d'Asturies (XXPA) que caltienen al Gobiernu del Principáu, PSOE y d'IU-BA-Verdes, unieron güei los sos votos (21 de PSOE y 4 d'IU-BA-Verdes) pa refugar les enmiendes de totalidá presentaes pol PP (20 votos) hacia los proyeutos de Llei del Principáu d'Asturies de Presupuestos Xenerales pal 2009 y de Midíes Presupuestaries, Alministratives y Tributaries d'Acompañamientu.

D'esta forma, la Cámara fixó güei la cantidá global d'un proyeutu que sube a 4.394 millones d'euros, un 7,68 por cientu más que la suma total de los recursos conteníos na prollongación presupuestaria y les lleis de midíes presupuestaries urxentes promovíes nel 2008.

Asina, tres la sesión plenaria de güei, el proyeutu sal alantre y nel Plenu de la XXPA que se va celebrar el próximu día 30, van discutise enmiendes al mesmu.

El PP señaló que'l documentu del Gobiernu ye "irreal", carez d'austeridá y nun contempla inversión bastante. Sin embargu, el PSOE caltuvo que les cuentes sí que movilicen el gastu necesariu pa dinmizar la economía nel contestu de la crisis, mientres qu'IU-BA-Verdes señaló que'l proyeutu garantiza a axentes económicos y ciudadanos, "seguridá" ante l'actual situación económica.

La diputada del PP Alejandra Cuétara foi la encargada de defender la enmienda a la totalidá señalando que'l proyeutu s'alloña de la solución que necesita'l Principáu pa un escenariu en que va aumentar la tasa de paru. Recordó que'l PP "s'ofreció" al Gobiernu nel mes d'ochobre pa pactar les llinies básiques, incluyendo un plan d'austeridá, pero que l'Executivu nin siquier respondió.

Precisamente, una de les crítiques del PP se refirió a la falta d'austeridá de les cuentes, y Cuétara reprochó que'l proyeutu contemple un gastu de 2.024 millones d'euros pa sociedaes públiques, organismos, entes autónomos y fundaciones, que suponen 504 millones si se descuenta lo correspondiente al Serviciu de Salú del Principáu d'Asturies y a la Fundación Grande Covián. Esa cifra, según Migoya, va destinada a lo que definió como "alministración paralela" del Principáu. "Éticamente nun tien un pase", afirmó.

Cuétara comentó que la deuda creció de manera "tremenda" y que nun va ser de 972 millones, sinón d'una cantidá más elevada, concretamente de 1.841 millones, lo que supón el 7,5% del PIB.

Criticó amás que los presupuestos nun son realistes, dao que tien calculáu que va ingresase ente 500 y 1.000 millones menos de lo previsto. Amás, echó en cara al Gobiernu que nun se faiga un mayor esfuerzu inversor. Dixo que la tasa n'inversión ye mui baxa y punxo como exemplu del sector del turismu "onde la inversión baxa de diez a 8,7 millones". En rellación a ayudes a Pymes, comentó qu'hai presupuestaes 43 millones, mientres que nel 2003 había 51 millones. Tamién criticó que'l presupuestu nun s'ocupe bastante de programes d'investigación, desarrollu y innovación.

APOYOS A LES CUENTES

Sin embargu, el diputáu del PSOE, Álvaro Álvarez, refugó dafechu esti asuntu que comentó que'l que nun se tomó "en serio" les polítiques d'I+D+i ye'l presidente d'España, José Luis Rodríguez Zapatero, amás de tola Alministración socialista.

Álvaro Álvarez dedicó'l so tiempu a dir contrarrestando los argumentos del PP. Asina dixo que la oposición cai nel "colmu de la degamoxa" nel conceutu "alministración paralela", al Sespa, l'Hospital d'Oriente, l'Idepa o otros instrumentos del Principáu. "Lo único que pretenden ye crear confusión", llamentó'l diputáu socialista.

Defendió'l proyeutu de presupuestos porque ye "espansivu nel gastu", dalgo que persigue incentivar l'actividá económica nesta situación. Mientres tanto, llamentó que'l PP pida reducir gastu, pero nun especifique de qué partíes. De fechu, Álvaro Álvarez consideró que ye llóxico, que'l presupuestu creza pa meyorar la inversión y garantizar prestaciones les prestaciones sociales, con más capacidá de movilización de recursos.

El diputáu del PSOE refugó amás que los presupuestos tean inflaos y esplicó qu'esa acusación la fai tolos años el PP. Sin embargu, sorrayó que los responsables de la Conseyería d'Economía y Facienda acreditaron la so capacidá pa prever los ingresos, dao que nos últimos años s'algamó unos graos d'execución d'entornu al 93 por cientu.

Tamién negó que los presupuestos nun seyan lo bastante inversores, y dixo que'l proyeutu prioriza les inversiones n'obra pública, col oxetivu de xenerar actividá.

Pela so parte, el voceru d'IX-BA-Verdes, Jesús Iglesias, defendió'l proyeutu basándose fundamentalmente na idea de "seguridá" que tresmite tanto a axentes económicos como a los propios ciudadanos, n'especial a los más castigaos pola crisis. Esplicó que'l presupuestu ye espansivu, pero qu'eso ye compatible cola austeridá.

Iglesias destacó l'apuesta pol caltenimientu del emplegu, con un refeurzu de les partíes del serviciu públicu d'Emplegu, que consiste nun incrementu del 15 por cientu. Añadió que, daes les restricciones al creitu, se destinen 226 millones p'avales.

En materia de polítiques sociales, resaltó que les cuentes de la Conseyería de Bienestar Social crecen un 14,6%. L'oxetivu, según Iglesias, ye'l refuerzu de les polítiques sociales, y punxo como exemplu l'aumentu de la partida pal salariu social, asina como una mayor inversión en vivienda protexida.

Iglesias recordó que'l presupuestu surde d'un pautu de Gobiernu ente FSA-PSOE y IU-BA-Verdes, frutu de la necesidá de combatir la crisis "dende una perspectiva d'izquierdes", porque "la respuesta a la crisis nun pue ser la de dar continuidá a les polítiques que la xeneraron". Amás, refugó qu'haya peligru de nun ingresar lo previsto, porque señaló qu'existen "garantíes" abondo.

A lo último, cargón escontra la posición del PP, formación a la qu'acusó de protagonizar una "mala estratexa" en materia presupuestaria, con propuestes mui diferentes. P'argumentalo, lleyó una serie de recortes de prensa con declaraciones del PP. "Esto nun contribuye a que se gane credibilidá", dixo a los 'populares'.

Contador Estadistiques