Los informes sobre la xestión del temporal nel Güerna confirmen una actuación "indebida" d'Aucalsa

El sodelegáu del Gobiernu en Lleón, Francisco Álvarez, aseguró güei que los informes sobre les circunstancies qu'arrodiaron el pieslle de l'AP-66 el pasáu día 14 tres el temporal rexistráu, onde quedaron atrapaos más de 500 vehículos por mor de la nieve, confirmen una actuación "indebida" per parte de la firma de la concesión, Aucalsa.

"Los informes tán acabaos y unviaos al Ministeriu de Fomentu, que va ser el que nesti momentu saque les conclusiones con esti informe y toles informaciones algamaes de toles partes, incluyida Aucalsa", apuntó.

Amás de les declaracioens que realice nesti sen Aucalsa, el Ministeriu dispón de la información incluyida nos informes realizaos poles delegaciones del Gobiernu del Principáu d'Asturies y de Castiella Lleón.

De la mesma manera, señaló que lo que manifiesta nesti sen la empresa concesionaria "ye mui importante", polo que'l Ministeriu de Fomentu va estudiar la versión de toles partes, va tomar les decisiones oportunes y, "nel so casu", va solicitar les responsabilidaes precises.

Francisco Álvarez realizó estes declaraciones güei, tres presidir la Comisión Provincial de Tráficu, un órganu de coordinación en materia de seguridá vial nel que s'integren representantes de la Xefatura Provincial de Tráficu de Lleón, de la Comandancia de la Guardia Civil, del sector de Tráficu de la Guardia Civil de la delegación de la Xunta en Lleón, de la Conceyalía de Tráficu del Ayuntamientu de Lleón y de la Diputación Provincial.

Pela so parte, fontes de la Delegación de Gobiernu n'Asturies por Europa Press confirmaron que s'acabaren los trabayos, pero evitaron dar detalles de los mesmos. Según esplicaron, van na llinia de lo que vino señalando sobre lo asocedío'l Delegáu del Gobiernu n'Asturies, Antonio Trevín.