Gran xiblada contra Reyes ya himnu d’España na Copa del Rei

|

La previa de la victoria del Barça na final de la Copa del Rei foi protagonizada por dos grandes xiblaes; una contra los Reyes d’España y otra al sonar l’himnu del Estáu.

La primer foi la que'l públicu del Bizkaia Arena de Bilbao dedicó a los Reyes d'España, Xuan Carlos y Sofía, cuando llegaron al palcu del pabellón pa presidir el partíu. Unos pocos espectadores, na mayoría autoridaes allegaes al palcu y siguidores del Real Madrid, foron los únicos en tola grada qu'aplaudieron a los monarques.
 
La segunda prodúxose cuando sonó l'himnu d'España unos segundos depués, como correspuende protocolariamente  na presencia de los monarques. Les dos pitaes fueron notables y la del himnu foi acompañada de berros de “fuera, fuera”.
 
Na tresmisión de TVE corrixóse’l soníu de la escena pa que se sintiera más fuerte l'himnu que los xiblíos, xustamente lo contrario de lo que se produxo nel escenariu de la final, onde práuticamente nun s'escucharon nada les notes del himnu.
 
Yá asocediera lo mesmo na final de la Copa de fútbol en Mestalla ente'l Barça y l'Athletic de Bilbao, sicasí, nesa ocasión cortóse la tresmisión pa emitir l’himnu allanzáu, lo que-y costó’l puestu al direutor de deportes del ente estatal, Julián Reyes.

Contador Estadistiques