El PP d'Asturies exixe que'l modelu de financiación s'apruebe por unanimidá y IU s'opón a negociaciones billaterales

El presidente del PP d'Asturies, Ovidio Sánchez, dixo güei que va exixir que'l nuevu modelu de financiación s'apruebe por unanimidá y se faiga con multillateralidá. Asina, mostró la so preocupación polos alcuentros que'l presidente d'España, José Luis Rodríguez Zapatero, caltuvo'l fin de selmana con Cataluña y Andalucía. Na mesma llinia, IU d'Asturies alvirtió de que nun va almitir negociaciones billaterales pa la financiación autonómica.

A xuiciu de Sánchez, qu'ofreció güei una rueda prensa na Xunta Xeneral del Principáu, les cites respuenden a la "debilidá" de Zapatero, que ta cediendo a les prestensiones de los nacionalistes y hasta del PSC, que busca una financiación "distinta" y "privilexada" pa Cataluña.

Pa Sánchez ye fundamental salvaguardar los principios d'igualdá y solidaridá. Refugó les rellaciones de billateralidá ente'l Gobiernu y Cataluña, proque supón "el peor escenariu posible" pa comunidaes autónomes como'l Principáu.

Dixo que los intereses de Cataluña nun se correspuenden colos d'Asturies, onde factores como la orografía, l'espardimientu poblacional o l'avieyamientu inflúin nel gastu.

SOLIDARIDÁ TERRITORIAL

El coordinador d'IU Asturies, Jesús Iglesias, manifestó que nun ye posible un modelu de financiación que nun garantice la solidaridá territorial.

"IU d'Asturies nun va almirtir negociaciones billaterales que pongan en peligru la igualdá de los ciudadanos, independientemente de la comunidá onde residan", destacó la coalición al traviés d'un comunicáu, a la vez qu'añadió que'l nuevu modelu de financiación debe garantizar precisamente qu'un ciudadanu de Sitges (Cataluña) tenga los mesmos servicios qu'ún de Taramundi (Asturies) y al revés.

El modelu de financiación, a xuiciu de Jesús Iglesias, debe tar basáu na solidaridá, la igualdá y la suficiencia financiera de les comunidaes autónomes, polo que reclamó esfuerzos a tolos implicaos y una "actitú xenerosa".

El coordinador xeneral, insistió en que nun comparte les negociaciones billaterales nin que nenguna otra comunidá fale por Asturies. "Por Asturies, sólo pue falar Asturies", aseguró.

Nesti sen, indicó que la financiación autonómica tien de ser frutu d'un acuerdu que, por definición, ye multillateral, polo qu'IU d'Asturies va defender con firmeza, un modelu de financiación equilibráu, xustu y solidariu que, dende llueu, vele polos intereses xenerales de la comunidá autónoma asturiana.

El Coordinador Xeneral d'IU d'Asturies alvirtió de que ye necesario definir un modelu de financiación estable y duraderu. "Poro, nun basta dicir que nel momentu cero, demientres el primer añu del nuevu modelu de financiación, toles comunidaes van tener más recursos como espresa Zapatero", dixo Iglesias, qu'añadió que "ye imprescindible resolver la suficiencia financiera de les comunidaes autónomes a mediu y llargu plazu pa evitar les desigualdaes autonómiques".