BA piensa qu'Asturies ta en peores condiciones pa negociar el carácter d'un nuevu Estatutu d'Autonomía

|

El voceru de la formación asturianista Bloque por Asturies, Pablo Fernández, llamentó güei que'l Principáu d'Asturies perdiere la oportunidá d'aprobar la reforma d'un Estatutu d'Autonomía "de primer división". Al so xuiciu, esta circunstancia fai que'l Principáu tenga menos pesu políticu y peores condiciones a la hora de negociar el nuevu modelu, en rellación a otres comunidaes como Cataluña o Andalucía, que sí sacaron alantre los sos nueves estatutos.

En declaraciones a Europa Press, Pablo Fernández, reprochó al PSOE y PP asturianos que nun dieren la importancia que se merez al procesu de reforma. "Ta demostrándose que'l so 'gatillazu' estatutariu tien consecuencies", dixo'l voceru de BA, formación incluyida na coalición IX-BA-Verdes, que caltién al Gobiernu asturianu xunto al PSOE.

Pablo Fernández considera asina necesario qu'Asturies cuente con un Estatutu de "primer división", que s'ellabore dende'l "conceutu nación", y non dende una perspectiva rexonal. La situación actual, comentó, dexa al Principáu subordináu a los intereses d'otres comunidaes que sí tán nesa "primer división".

En tou casu, Bloque por Asturies, ofreció tol so apoyu al presidente del Principáu d'Asturies, el socialista Vicente Álvarez Areces, pa que defenda los intereses de los asturianos. Pablo Fernández criticó amás al PP por "utilizar" un tema vital como'l de la financiación pa facer oposición.

Contador Estadistiques