De "Thriller" a "La nada y tu"

El videoclip n’asturianu ta dando nos últimos tiempos reblagos, un xéneru que permite a los músicos dase a conocer y a los creadores audiovisuales esperimentar con llinguaxe y imaxes.

El videoclip como tal ñació na década de los sesenta de la mano de The Beatles, grupu que grabó una actuación n’esteriores y con técniques de cine énte la imposibilidá de dir a tolos programes televisivos que pidíen la so presencia. Años más tarde llegaría l’esitosu videoclip de “Bohemian Rhapsody” de The Queen, esparciendo la producción de videos ente les discográfiques, vendrá tamién el ñacimientu de MTV, primer canal de videos musicales, y en 1983 llegaría “Thriller” de Michael Jackson, marcando un puntu y aparte nel mundu de los clips, obra condiderada’l meyor videu musical de tolos tiempos.
 
Nel nuesu país, el xéneru nun yera mui cultivao ente los grupos que faen la so música n’asturianu, pera la cosa entama a camudar. Nos últimos díes, apaeció’l clip de “La nada y tu” d’Alfredo González y “Blancos andantes” de Dixebra, dos cantares bien estremaos que son prueba de la calidá de la nuestra música.
 
Y esti pequeñu españíu del videoclip n’asturianu nun pue entendese ensin les posibilidaes qu’ufre la rede. Asina, el propiu Alfredo González señala qu’internet ye una solución más qu’un problema pa la música, “prueba d’ello ye qu’en ocho díes, “La nada y tu” tuvo 2.000 visites, colgóse nunos 40 blogues y dellos medios dixitales falaron d’él”.
 
Del mesmu paecer ye Guillermu Fernandi, realizador del nuevu videoclip de Dixebra. “Dende l'apaición d'internet ta animándose la producción, agora hai xente preprarao que ta trabayando nel audiovisual nun texíu paralelu al pseudo-texíu precariu creáu pol Gobiernu asturianu al traviés de la puesta en marcha de la RTPA”, señala Fernandi.
 
El videoclip aporta un nuevu llinguaxe pa los creadores asturianos, “permite más esperimentación que’l curtiometraxe”, en pallabres de Juan Tizón, ún de los responsables de Señor Paraguas, productora de “La nada y tu”. Mientres que la so compañera, Sofía Castañón, esclaría que col videu quixeron celebrar la bona poesía que se fai n’Asturies, en referencia a la lletra d’Antón García, “y que fuera d’equí puean descubrir una llingua y una creación nesi idioma”.
 
Pa facer un videoclip hai que traducir les pallabres y la voz n’imaxes. Guillermu Fernandi esplica como ye’l procesu creativu ente’l músicu y el realizador: “A lo primeiru escoyimos el cantar, ellos decantábase por "Blancos andantes", que yera una de las que you baraxaba. El guión ía de mio y depués charré sobre él con ellos, pa ver que-ys paez, ya pocu a poucu vamos grabando y visionando pa finar col trabayu”.
 
Dende Señor Paraguas cuenten qu’Alfredo González dio-yos total confianza y potestá pa facer el clip, anque definen el trabayu más como un videu de creación que como un trabayu publicitariu, “dende qu’escuchamos la canción surdió la idea”, comenta Juan Tizón.
 
El propiu Alfredo González fala de la necesidá de promoción de los artistes asturianos, yá que tamos nun país “onde más allá d’El Sueño de Morfeo y Melendi nun se conoz nada”. Señala tamién la importancia de los medios de comunicación, comentando la poca importancia que-yos dan los grandes medios escritos a la cultura y les curties estayes que se dan na RTPA a la música propia y a la mesma llingua: “El problema de la TPA colo propiu ye’l mesmu que’l de la llingua nel franquismu. Nun se prohibió; ridiculizase, y paez que na canal pública tienen esos prexuizos d’otres dómines”.
 
Guillermu Fernandi señala que ye una pena que por razones polítiques la TPA, nun faiga por promocionar la nuesa música ya cultura, “amas por ser esto polo que se creo”. Esclaria que la música del país namás ye recoyida nos espacios n’asturianu, “que tán marxinaos dientro de los horarios de la TPA a pesar de tar el share d'estos per enriba la media de la canal”.

N’Asturies hai que remontase a entamos de los ochenta p’atopar los primeros videoclips na nuesa llingua. Ye nesta época cuando TVE-Asturies graba una serie de videos en 16mm de Nuberu, onde ponen imaxes a cantares tán míticos como “Dios te llibre de Castiella”.
 
Después, yá na década de los noventa, amparaos pol ésitu n’Asturies y nel restu del Estáu, “Los Berrones” graba los sos primeros videoclips. Tamién vendríen el “Rigu Esba” de Llan de Cubel o'l "Tamos Fartos" de Lliberdón. Yá nes últimes bocanaes de la década y del sieglu apaez el “Nun llores” de Dixebra, que la Direición de TVE-Asturies niégase a emitir. El rock astur, qu’entama a espoxigar naquellos años, vuelve ser protagonista d’un clip musical en 1999 col tema "Estrelles ensin nome" de los desapaecíos Avientu, estos son namás dalgunos exemplos, quiciabes los únicos nos últimos venti años del sieglu XX, que podemos topar nel portal YouTube o n'Asturies.com TV.
 
Ensin dulda, nos próximos años, cola bayura de música n’asturianu y los bonos realizadores qu’entamen a esparden los sos trabayos, el mundu del videoclip n’asturianu nun dexara de medrar.
 
N'Asturies.com TV pues ver dalgunos videoclips asturianos.