Caxa Rural d'Asturies tien un resultáu llíquidu de 16,43 millones

Caxa Rural realizó una dotación superior a 20 millones d'euros pa la cobertoria de creitos y otros activos, colo que reduxo en cuatro'l resultáu llíquidu, qu'algama la cifra de 16,43 millones.

Según informó la entidá, l'aumentu del negociu nun 6% y la contención del gastu, nun 2,79%, compensaron la baxada d'intereses y permiten caltener les cifres d'esplotación na cuenta de resultaos y meyorar la ratio d'eficiencia -que mide'l porcentaxe de gastos sobre ingresos- hasta'l 46,23% (-0,38%).
  
Los depósitos de clientes incrementáronse en 193 millones d'euros, un 10% -promovíos poles cuentes a la visita y les imposiciones a plazu-, y les inversiones en 48 millones, un 2,23%. Resulta destacable la concesión de 2.146 operaciones, por importe de 171 millones, destinaes a la compra de vivienda por particulares.
  
La constante potenciación de les reserves permite presentar un coeficiente de solvencia (Core-Capital) del 15,52%, que dobla la media ofrecida pol sector. Los espertos consideren qu'esta variable como mínimo debe de tar sobre'l 7% y qu'un nivel cómodu ta penriba del 8%.
  
La entidá financiera asturiana caltién un criteriu exixente na valoración de los riesgos soxetivos con  un seguimientu constante de les operaciones irregulares. Asina, nel mes d'avientu, l'índiz de cobertoria de la entidá ascendió al 87,95% sobre un conteníu ratio de morosidá del 2,93%.