La Busdonga, 50 años ensin un mitu

|

Fai güei 50 años, morría en Xixón Obdulia Álvarez Díaz, La Busdonga, según tolos espertos la gran dama de la canción asturiana de la primer metá del sieglu XX, la época de los cantaores que sentaron escuela pa les xeneraciones vinientes.

La Busdonga foi la primer muyer que s’atrevió a salir de la cocina pa xubise a un escenariu o metese nun estudiu de grabación. Yera dueña d’una gran voz cola que tocaba tolos palos, dende un cantar flamencu hasta la más difícil de les asturianaes. Anguaño les sos grabaciones son lleiciones pa los cantaores d’anguaño, que siguen interpretando cantares como “Al pasar per el Puertu” al “mou de La Busdonga”.
 
Asina lo señala, una de les grandes voces de la tonada d’anguaño, Anabel Santiago, qu’afita la figura de La Busdonga como la gran referencia femenina dientro de les voces clásiques. “La so influyencia nes cantantes de tonada ye de suma importancia, amás de marcar una dómina, simboliza la primer voz de muyer que tuvo la oportunidá de grabar y dase a conocer nun círculu capitaneáu por homes, con un estilu y bon facer que poques cantaores supieron igualar”, esclaria.
 
La gran dama de la tonada ñació en 1896 en La Fuente la Plata (Uviéu). El so nomatu vino-y pol destín del so padre, como ferroviariu nel pueblu lleonés de Busdongu. A primeros del sieglu pasáu, la so familia treslladóse a Mieres, onde los sos padres ponen un chigre, que foi onde Obdulia fixo les primeres interpretaciones con públicu.
 
Nos años venti grabó una serie de discos xuntu’l compositor y pianista Baldomero Fernández. D'esa collaboración salieron delles de les tonaes qu'algamaron mayor ecu dientro'l xéneru, como “Anda y señálame un sitiu”.
 
La Busdonga siguió grabando discos, en dalgunos acompañada a la gaita pol so hermanu Ángel, conocíu tamién pol nomatu d’El Busdongu. Dalgunos cantares como “Canteros de Covadonga”, “En la gaita traigo Asturies” o “Hai una llinia trazada”, convirtiéndose nún de los corpus canónicos de la tonada.
 
El 27 de xineru de 1960 apagóse en Xixón la voz d’Obdulia Álvarez Díaz, La Busdonga, dexando tres de si una de les carreres más importantes dientro de la nuestra canción nacional, afitando un modelu que tovía anguaño ye’l más siguió poles interpretes femenines de tonada.

Contador Estadistiques