Ecoloxistes llamenten que'l Gobiernu asturianu permita daños en Carondio

La Coordinadora Ecoloxista amosó'l so malestar pola respuesta de la Conseyería de Cultura a la denuncia que realizaron sobre los daños na Sierra de Carondio, por mor de les obres d'accesu al parque eólicu.

"Llamentamos el papel d'Asturies que permite la destrucción del nuesu patrimoniu arqueolóxicu nun entornu d'altu valor natural que diba quedar afeutáu de facese'l parque eólicu previstu, pal beneficiu esclusivu d'una empresa eléctrica nesti vendaval eólicu que percuerre l'Occidente asturianu colos sos fuertes impactos asociaos", dixeron dende Coordinadora al traviés d'una nota prensa.

Los ecoloxistes dixeron que los daños son responsabilidá tanto de la empresa de les obres y de les dos alministraciones que los permitieron.
  
En concreto, señalaron que'l de Carondio ye un parque eólicu con 25 molinos de 2 MW, nun paraxe d'altu valor natural y onde s'alcuentra'l mayor conxuntu tumular d'Asturies que se vería dañáu enforma. Recordaron qu'hai 34 túmulos na zona, lo que representa un "conxuntu inigualable", nun paisaxe protexíu como la sierra de Carondio, onde se conserven "abondos nicios de les cultures primitives d'antiguos pobladores y pola práctica totalidá de la sierra apaecen abondos túmulos funerarios; con posterioridá a l'autorización ambiental descubrióse un campamentu romanu que tamién diba sufrir afeiciones".