28 músicos de tres bandes de gaites asturianos van estrenar el sábadu 'L'alborada de los Premios', de Xuacu Amieva

Un total de 28 xóvenes músicos asturianos, pertenecientes a les bandes de gaites Naranco, d'Uviéu, La Reina'l Trúebanu, de Navia, y Villa de Xixón, van interpretar el sábadu la composición pa bandes de gaites 'L'Alborada de los Premios Príncipe d'Asturies', del maestru Xuacu Amieva.

L'estrenu oficial de la obra, compuesta espresamente pa la Fundación Príncipe d'Asturies, va tener llugar a les 10.00 hores nel Patiu de la Reina del Hotel de la Reconquista d'Uviéu. El proyeutu nació del alcuentru 'Meyores Gaiteros del mundu', que la Fundación Príncipe d'ASturies organizó n'Uviéu'l pasáu mes de xunetu y qu'aconceyó a seis destacaos solistes del panorama internacional de la música folk.

La pieza tien una duración de siete minutos y van interpretala les gaites en'Si bemol' y instrumentos de percusión, tambores tenores y un bombu, esplicó la Fundación nun comunicáu.

Xuacu Amieva ye una de les figures más reconocíes de la música tradicional asturiana. Ye profesor de gaita y conxuntu de música folk de la Escuela Internacional Música de la Fundación Príncipe d'Asturies. La so llarga carrera como gaiteru, maestru de gaiteros y miembru de delles formaciones folk proporcionó-y un gran prestixu dientro y fuera d'Asturies. Nel so repertoriu ta una amplia seleición de cantares y melodíes de la tradición asturiana, non sólo del repertoriu de gaita, sinón tamién de rabel, zanfona, flauta o canción.