L'Asociación Cultural Garabuxada presenta esti domingu a les 18.30 hores, frente a la Rula de L'Arena 'El Cuento de El Angulero'. Trátase de la primer obra basada nun personaxe asturianu que s'encarga de repartir los regalos en Nuechebona, ideáu polos propios editores.

El llibru illustrólu'l dibuxante y periodista Christian Bartsch y cuenta con testos de los responsables de la Biblioteca de la población de L'Arena, nel conceyu de Sotu'l Barcu.

Según esplicaron los sos autores en declaraciones a Europa Press, los exemplares d'esta obra editaránse baxo demanda de particulares o asociaciones interesaes.
  
Amás, ta previsto que'l primer exemplar del cuentu lu unvíe a la Xunta Xeneral del Principáu d'Asturies, "pa que los representantes de los tolos asturianos conozan esti personaxe que s'encarga de tornar en realidá los deseos de Nuechebona".
  
La edición cuerre a cargu de 'Garabuxada Ediciones' y ta pensada, según los sos autores, "pa que los neños puean manexalu sin problemes, con páxines d'altu granaxe". El volume, de 22 páxines en color, gran formatu y tapes dures, cuenta con abondes illustraciones, lo que fai que'l públicu infantil pue ser el primer llector.
  
Con esti llibru, uníu a la cabalgata del Día de Nuechabona y otres actividaes, Garabaxuda pretende formentar la tradición asturiana frente a l'anglosaxona y provocar "l'interés pola angula y l'anguleru'.