Los ecoloxistes critiquen que'l Principaú permita qu'Industrias Doy-Manuel Morate, S.L siga en Trubia

La Coordinadora Ecoloxista d’Asturies vien d’anunciar al traviés d’un comunicáu que’l Principáu refugó’l recursu de reposición que presentaron fai 16 meses contra  l’Autorización Ambiental Integrada de la empresa Industrias Doy-Manuel Morate, S.L, asitiada en Trubia. Pa los ecoloxistes, a pesar de los incumplimientos de la empresa, el Principáu va permití-y siguir furrulando otros tres años, “ensin importá-y l’impactu que ta xenerando en Trubia”.

Pa la Coordinadora, la empresa de coquería de carbón presenta una gran precariedá pola vieyura de les instalaciones. Los ecoloxistes recuerden que’l Conceyu d’Uviéu reconoció que la empresa incumple numberoses condiciones, destacando l’incumplimientu de los niveles de ruíu.
 
Del mesmu mou, quieren recordar la mala calidá del aire de la zona, onde amás hai otres empreses contaminantes. Los ecoloxistes recuerden los graves problemes que presenta la empresa a pesar de los espedientes y denuncies; contaminación por óxidu d’azufre, combustión ensin filtros, nun trabayar con carbones con poco azufre, nun tener captación de gases nel procesu de desfornáu, contaminación del polvu nel aire pol mal almacenamientu… ente otres munches.