España estenderá les sos fronteres somarines a lo llargo del Mar Cantábricu

L'investigador del Institutu Xeolóxicu y Mineru d'España (IGME), coordinador científicu del proyectu d'ampliación de la plataforma continental española y aesor del Ministeriu d'Asuntos Esteriores nestes materies, presentó güei n'Uviéu los trabayos d'investigación que llevarán a España a estender la so plataforma continental, tanto nel Cantábricu como en Galicia. Trátase de trabayos que se presentaron na sede de la Convención de Naciones Uníes sobre'l Derechu de la Mar en Nueva York (EE.UU), pola delegación española.

La presentación d'estos datos científicos qu'avalen l'ampliación de la plataforma tuvo llugar nel marcu del sestu Simposio sobre'l marxe ibéricu atlánticu que se celebra esta selmana n'Uviéu y qu'aconceya a la mayor parte de los investigadores de la mar sobre'l marxe ibéricu, tanto d'España como de Portugal y Francia, según informó l'IGME al traviés d'una nota prensa.

La Convención del Derechu de la Mar de Naciones Uníes nel so artículu 76 permiten a un Estáu trazar les llendes de la so plataforma continental, más p'allá de les sos 200 milles marines, si asina lo avalen los sos datos científicos. La Plataforma Continental, igual que la Zona Económica Esclusiva (ZEE), son términos xurídicos contemplaos na Convención de Derechu de la Mar, llendaes a les 200 milles marines midíes dende la so costa. Únicamente la Platorma Continental, un términu xurídicu que contempla la xurisdicción sobre los recursos naturales de los fondos marinos y subsuelu, pue estendese hasta un máximu de 350 milles marines mediante l'aplicación del citáu artículu.
  
Tanto les reserves de gases y gases hidrataos fonderos del subsuelu, asina como de los nódulos y costres polimetálicos de los fondos marinos ricos en fierru, cobaltu y níquel, entraríen baxo la xurisdicción del términu "plataforma continental".
  
Dada la importancia económica de dicha ampliación, 51 países con costes y espacios marítimos yá presentaron les sos propuestes d'estensión. En dalgunos casos como'l d'España, Reinu Uníu o Francia realizáronse delles propuestes dividíes por árees xeográfiques, mientres qu'otros como Brasil, Arxentina o Austriali les realizáronse nuna única presentación.
  
"El nuesu oxetivu ye algamar l'ampliación de más de 330.000 kilómetros cuadraos de nueva plataforma continental", señaló Luis Somoza, que dixo que "eso significa más de la metá de la estensión de la España surdida, incluyendo Baleares y Canaries".
  
"Hasta agora, algamamos 78.000 kilómetros cuadraos con nueves llendes nel Cantábricu y propunximos más de 60.000 kilómetros en Galicia, y nes Isles Canaries podemos llegar a 200.000 kilómetros cuadraos", apuntó.
  
Igual qu'otros países europeos, España siguió la estratexa de dividir les sos propuestes en trés árees xeográfiques diferentes. Mar Cantábricu, Galicia y Isles Canaries. Dao que nel casu del Mediterraneu, España nun tien opción d'estensión, puesto que les sos llendes colos países ribereños son menores a les 200 milles marines. "Fuimos ún de los primeros países n'algamar l'aprobación de la estensión d'una parte de la nuesa plataforma. Hasta'l momentu, presentáronse más de 51 países", apunto Somoza.