El Sespa estima 107 casos de sida n'Asturies nel 2009 y promueve l'usu del condón pa evitar contaxos, que van n'aumentu

La directora xeneral de Salú Pública del Principáu d'Asturies, Amelia González, indicó güei en rueda prensa que'l Serviciu de Salú del Principáu (Sespa) calcula unos 107 nuevos casos d'infeición del virus del VIH/SIDA na comunidá no que va del 2009, y defendió l'usu del condón pa evitar los contaxos, que van n'aumentu.

González, qu'esclarió que se trata de datos provisionales y orientativos a la espera de disponer de la información definitiva, señaló que de los 107 nuevos casos, 82 danse n'homes y 25 en muyeres. De la mesma manera, señaló que la mayoría de los infectaos tán nel tramu d'edá d'ente 25 y 44 años. Nel 2008 rexistróse una afeición añal de 172 infeiciones de VIH.

La directora xeneral destacó que la principal vía de tresmisión de la enfermedá ye la sexual, nel 77 por cientu, mientres que se ta reduciendo'l contaxu por usu de xeringues compartíes. De la mesma manera comentó que s'observa un aumentu progresivu ente los homes homosexuales, y qu'ente los homes heterosexuales tamién s'incrementa pero de manera menos pendiente.
  
Amelia González ofreció güei n'Uviéu estos datos con motivu del Día Mundial de la Llucha contra'l Sida, en compañía del coordinador de Xega, Tino Burgos, y la responsable de la Unidá ITS del Hospital Monte Naranco, Maria Junquera.
  
González calcó en que la evolución histórica del Sida dende 1986 hasta'l 2008 foi baxando, lo que considera positivo, anque destacó que nos últimos años ta viéndose una estabilización. Nesti sen, afirmó que dende'l Serviciu de Salú nun se resignen y continuarán trabayando pa reducir la tasa d'infectaos.
  
Poro, defendió l'usu del preservativu pa evitar los contaxos, qu'entiende va tar aumentando porque se ta perdiendo la noción de riesgu nes práctiques sexuales sin proteición.
  
Amás, mostró preocupación pol fechu de que'l 34 por cientu de los infectaos fueron detectaos cuando yá teníen un déficit inmunolóxicu considerable. Eso se debe, según indicó, a la demora nes pruebes de detección de VIH/Sida, n'especial ente la población heterosexual, polo qu'encamentó a la población que realizare la prueba cuanto antes si se caltuvieron práctiques sexuales de riesgu.
  
Amelia Goznález aprovechó pa poner l'acentu nel aumentu del conxuntu de les enfermedaes de tresmisión sexual, n'especial de gonococo -pasóse d'once infeiciones nel 2003 y 62 nel 2008-- y sífilis, --de 33 infeiciones nel 2003 a 210 nel 2008--. Polo que reiteró la importancia del usu del preservativu nes rellaciones sexuales.
  
Pela so aprte, el coordinador de Xega, Tino Brugos, indicó que los datos estimaos p'Asturies "nun sorprienden", y tán en consonancia cola tendencia xeneral en toles comunidaes autónomes.
  
Poro, apostó por promover les campañes de concienciación y faceles más atractives, dao que dixo oservar que'l desarrollu del VIH d'enfermedá mortal a patolóxica crónica tiende a "relaxar y rebaxar les prevenciones", polo que ye fundamental llograr más impactu ente la población.
  
De la mesma manera, Marisa Junquera esplicó que les consultes y les pruebes de detección nes unidaes del ITS de Xixón y Uviéu "son anónimes", polo qu'animó a acudir a consulta y destacó la importancia de la educación.