El gobiernu autonómicu zarra los presupuestos del 2010, qu'ascienden a 4.428 millones, un 0,77% más que nel 2009

L'Executivu asturianu zarró güei nel conseyu de Gobiernu'l presupuestu pal próximu 2010, unes cuentes qu'ascienden a 4.428 millones d'euros, lo que supón un incrementu d'un 0,775 sobre'l 2009. Les cuentes aprobaránse de manera definitiva'l próximu llunes nel Conseyu de Gobiernu estraordinariu pa llevales al parlamentu'l "martes o'l miércoles".

En rueda prensa'l conseyeru d'Economía y Facienda del Principáu, Jaime Rabanal, destacó la "estraordinaria complexidá" pa cuadrar les cifres. Rabanal aseguró que'l presupuestu a lo último respuende "a les necesidaes que tien Asturies, garantiza los servicios públicos fudnamentales, pon sobre la mesa munchos millones d'inversión y muestra la voluntá d'austeridá del Executivu".
  
El conseyeru insistió no complexo de cuadrar les cuentes, dao que por mor de la crisis el Principáu deberá facer frente a una "brusca y simultánea cayida d'ingresos". Nesti sen, indicó que los ingresos corrientes serán un 4% más baxos que nel añu anterior, igual que los ingresos de capital y el Fondu de Compensación Interterritorial, que tamién baxarán. Too ello supondrá contar con 350 millones d'euros menos procedentes de los ingresos.
  
Por too ello, el Principáu decidió recurrir al máximu de deuda, col 2,75% del PIB -633 millones d'euros--, dalgo que foi posible "gracies a la situación anterior con cuentes saniaes". Amás, Rabanal indicó que se tuvo en cuenta l'equilibriu de les financies públiques nel mediu y llargu plazu.
 
OXETIVOS
  
Nesti "complexu contestu", el gobiernu trató de llograr dellos oxetivos nes cuentes. Ún d'ellos, el de l'austeridá, pa lo que s'axustaron munches partíes de gastu que permitieron aforrar "40 o 50 millones que se destinen a otres prioridaes".
  
Nesti sen, Jaime Rabanal indicó que, menos les de Salú y Servicios Sanitarios y la de Bienestar Social, toles conseyeríes vieron amenorgáu'l so presupuestu.
  
Too ello p'algamar otru de los oxetivos que'l de llograr el caltenimientu de los servicos públicos básicos. "Ficimos un esfuerzu estraordinariu que mos permitió incrementar un 5,21 por cientu'l gastu sanitariu y dos puntos el gastu social", dixo Rabanal.
  
Asina, el gastu social llévase'l 67% del presupuestu, con más de 3.100 millones d'euros, un 2% más que la cantidá destinada nos presupuestos del 2009.
  
El terceru de los oxetivos persiguíos pol Executivu na ellaboración de les cuentes pal 2010 ye'l que tien que ver cola inversión. El titular d'economía esplicó que se llogró un volume d'inversión relevante, de sobre 1.280 millones d'euros, lo que supón un incrementu del 1,2 sobre'l 2009.
  
Con esti volume inversor, el Gobiernu "pon recursos adicionales pa que la rexón puea salir de la crisis", y amás faise un esfuerzu pa poder cumplir tolos compromisos enmarcaos nel Aceba.