La Conseyería de Mediu Ambiente entama esta selmana'l control de cuervos cagalones nos ríos Sella y Narcea

La Conseyería de Mediu Ambiente, Ordenación del Territoriu y Infraestuctures reforzará de magar esta selmana les actuaciones encaminaes a protexer la población de salmónidos en siete ríos asturianos. Nesti sen, el próximu xueves día 26 entamarán los controles de la población de cuervos cagalones grandes nos ríos Sella y Narcea.

Según informó la Conseyería nuna nota prensa prevése que les actuaciones de control se desarrollen en feches próximes, dao que ye agora la época de llegada d'estes aves y tendrán llugar en siete ríos asturianos: el Cares, el Sella, el Nalón, el Caudal, el Narcea, el Navia y l'Esva.

Dende la Conseyería, decidióse realizar una campaña de control d'esta ave, una vez que se constató un aumentu, nos últimos años, de les poblaciones ivernantes nes agües continentales. Colos controles previstos preténdese reducir l'afeición de los cuervos cagalones gtrnades qu'ivernen nel interior d'Asturies sobre los pexes continantes. Los controles realizarálos el personal técnicu o guardería de la Direición Xeneral de Biodiversidá o Paisaxe. Desarrollaránse con armes de fueu y munición reglamentaria y los exemplares garraos conxelaránse pal so estudiu.
  
Siguiendo les bases pa la xestión de les poblaciones de truches n'Asturies, les midíes de control del cuervu cagalón grandes deben realizase en zones medio altes, naquellos tramos fluviales nos que la so base alimenticia seyan los salmónidos o l'anguila y facelo de magar los meses de seronda, como midida aventadora y como forma d'amenorgar temporalmente, nos meses de seronda-iviernu, la tasa de consumu sobre les poblaciones. Realizaránse especialmente en zones dormideros y posaderos.