La Xunta Xeneral pide al Gobiernu autonómicu tomar midíes pa llograr más conexones aérees ente Asturies y Madrid

El Parlamentu asturianu encamentará al Conseyu de Gobiernu que realice les actuaciones necesaries pa que, enantes d'acabar el presente añu 2009, les conexones ente los aeropueros d'Asturies y Madrid se realicen en condiciones que nun supongan un agraviu comparativu pa los asturianos en coste y númberu de servicios, implicando nesti llabor al Ministeriu de Fomentu.
 
Va facelo tres aprobase por unanimidá una moción presentada pol grupu parlamentariu del PP que contó con una enmienda conxunta de los grupos del PSOE y IU-BA-Verdes.
 
El diputáu del grupu parlamentariu del PSOE, Faustino Álvarez manifestó que nun ye razonable que'l PP nun atienda pa los datos aportaos pol conseyeru d'Infraestructures na Xunta volviendo a repetir les mesmes crítiques y argumentos que na entruga previa a la moción. Álvarez indicó que dalgunos de los datos que plantega'l PP "nun se caltienen".
 
"Yá se-y esplicó que se llogró un incrementu de pasaxeros mayor del esperáu y se-y dixo tamién que l'usu del tren per parte de munchos pasaxeros ye otru de los factores que s'inclúi nes cifres del aeropuertu",  dixo Álvarez, qu'indicó que ye evidentemente qu'al Gobiernu inquiéta-y que los asturianos tengan que pagar más polos billetes, d'ehí la enmienda plantegada pol so grupu xunto a IU.
 
Pela so parte, el diputáu d'IU-BA-Verdes, Jesús Iglesias, indicó que la enmienda presentada pol so grupu xunto al PSOE lo que busca ye que se tope la fórmula pa solucionar el problema, evitando referise al monopoliu, tal y como facía'l PP na so moción.
 
El diputáu del PP, Juan Ángel Bustillo Gutiérrez, foi l'encargáu de defender la moción siguiente a la pasada entruga. Bustillo indicó que con esa moción quier acabase col agraviu comparativu que sigue sufiendo Asturies sobre'l restu del Cordal Cantábricu, pagando 20 veces más por un billete que los cántabros, con un escesu de coste diariu d'unos 200.000 euros.