Músicos asturianos piden a la SGAE que controle'l so rexistru pa que nun se cobren derechos d'autor por obra tradicional

|

Conocíos representantes de la música tradicional asturiana espresaron esta selmana la so esixencia a la Sociedá Xeneral d'Autores pa que realice peritaxe y mayores controles de les obres que se rexistren, a fin d'evitar que determinaes persones s'atribuyan los derechos d'autor de conocíos temes anónimos. Sicasí'l gaiteru José Ángel Hevia, directivu de la entidá, niega qu'exista esti problema y recalca que la SGAE sólo cobra derechos por arreglos o versiones de temes tradicionales rexistraos por otros grupos.

   Toos ellos ofrecieron la so opinón sobre'l procesu xudicial abiertu ente la SGAE y el Conceyu de Cabranes, de magar la demanda presentada pola Sociedá, que reclama al Conceyu 7.500 euros por derechos d'autor. Anque mui pequeña, de sólo 96 euros, existe una parte que correspuende a la interpretación de temes tradicionales per parte de la Banda Gaites Villaviciosa y dellos grupos de baile. De fechu, el director musical d'esta formación declarará como testigu nel xuiciu, pa defender que sólo tocó temes tradicionales y non nenguna versión de nengún otru músicu.

   Nesti sen, Hector Braga, músicu y musicólogu, exixó a la SGAE un peritaxe y un mayor control de les obres que se rexistren. Tien tien claro qu'existe'l problema de que determinaos autores inscriben al so nome temes tradicionales. El mesmu caltuvo hai unos años un procesu contra la Sociedá, tres reclamáse-y l'autoría de determinaes pieces de bandurria qu'él recuperare nun álbum, y que taben inscrites a nome d'otru autor. Nel xuiciu, con grabaciones en mano, algamó demostrar que los temes yeren anteriores a dicha inscripción, y nun teníen intérprete conocíu.

   Foi un puntu de vista nel que coincidió Xosé Ambás, gaiteru del grupu N'arba, y vocalista de Tuenda, conxuntu qu'arregla melodíes tradicionales, qu'él recupera tres grabar cantares qu'algama percorriendo pueblos y aldees asturianes. El so trabayu vese espeyáu na TPA, nel programa 'Camín de cantares'. "Toi a la escontra dafechu de que naide reciba beneficiu pola música tradicional", señaló. Sicasí, mostróse conforme con que haya arreglos rexistraos y encamentó a los músicos asturianos que lo faigan. Por esti moitvu, exixó a la SGAE un mayor trabayu de control de lo que se rexistra, col envís d'evitar que seyan arreglos, y non melodíes tradicionales.

   Xune elipe, cantante de Dixebra y responsable de Discos L'Aguañaz, casa qu'edita a munchos de los grupos de folk asturianos, foi tovía más exixente: "la SGAE debe facer un trabayu muncho más metódicu", porque Autores "nun sabe nin lo que rexistra nin lo que cobra", declaró enantes de considerar qu'exixir derechos d'autor por música tradicional "sería una 'atrocidá'".

NUN EXISTE'L PROBLEMA

   Sicasí, el gaiteru Hevia tien claro qu'esi problema nun existe. "Hai inorancia. Nun hai nenguna canción tradicional a nome de naide. Eso nun existe", señaló. Punxo dellos exemplos: "Remis Ovalle graba nos años 70 la 'Muñeira asturiana', con esti títulu, y cobra dende aquélla llexítimos derechos d'autor por eso, por una melodía tradicional qu'arregló". "Si se toca la 'Muñeira Asturiana' de Remis, cobrarán los herederechos de Remis, y si s'alude a la 'Muñeira Asturiana' del Gaiteru de Veriña, que tamién ta rexistrada al so nome, la referencia a la SGAE va parar a los herederos del Gaiteru de Veriña", esplicó.

   Según Hevia, "esta práctica de tomar la música tradicional como materia de trabayu ye normal nos gaiteros y los grupos de folk d'agora, y yera norma en Rimsky Korsakov, cuando compunxo la 'Alborada asturiana pa gaita', y con Joaquín Rodrigo, y con una montonera d'autores, tanto clásicos como populares". Matizó amás que se da tanto cola múscia asturiana como "cola d'autores que yá morrieron hai más de 90 años, y el so trabayu pasa a ser de dominiu públicu". "Que seya de dominiu públicu nun quier dicir que nun xenere derechos d'autor, sinón que los xenera al que la tresforma y la rexistra", añadió. Exemplificó col 'Himno de la Alegría' de Miguel Ríos. "Los derechos nun van pa los herederos de Beethoven, porque yá nun tán vixentes, van pa Miguel Ríos", añadió.

   A Hevia paéz-y bien que "haya xente 'amateur' y que nun cobre pola so música, y que la regale, pero los que mos sentimos profesionales y queremos cobrar pol nuesu trabayu, tamos en perfectu derechu de facelo".

NON A REXISTRAR LOS ARREGLOS

   Nesti puntu, mientres el restu de músicos muéstrase conforme col rexistru d'arreglos, Braga espresó'l puntu de vista contrariu. Al so xuiciu, esta práctica ye "una irresponsabilidá", si bien dexa claro que ye "una opción personal". "Yo pienso que'l que rexistra ye porque quier más dineru, y ye la llucha que yo personalmente tengo cola xente de la música tradicional", comentó. "El que quiera más dineru que lu  pida, que cobre más; si estima que'l so trabayu val más que pida más por una actuación", afirmó.

   De siguío, esplicó que si él tien un arreglu val-y con que se dixere que lu fizo. "Interésame pel contrario que se toque lo que yo faigo. Si soi arreglista, nun tien sen que rexistre eso, y que cobre cada vez que se toca nuna banda gaites, porque toi perxudicando a la propia música y va llegar el día en que nun se puea contratar a una gaita y a un tambor", afirmó. Dende'l so puntu de vista, "per esti camín vamos aniquilar la música tradicional, pol propiu egoísmu de la xente que rexistra".

Contador Estadistiques