Asturies ye la comunidá na que más baxó porcentualmente'l preciu de la vivienda nel tercer trimestre

Asturies ye la comunidá autónoma na que más baxó'l preciu de la vivienda nel tercer trimestre del añu, con un descensu d'un 11,6 por cientu na tasa interañal, ye dicir, sobre'l tercer trimestre del 2008, según datos del Ministeriu de Vivienda consultaos por Europa Press.
 
Nel conxuntu del país, el preciu mediu de la vivienda llibre asitióse en 1.902,8 euros por metru cuadráu nel tercer trimestre del añu, lo que supón un descensu del 8 por cientu sobre'l mesmu periodu del añu anterior, colo que modera'l so ritmu de descensu, tres la reducción del 8,3 por cientu esperimentada nel trimestre anterior.
 
Con esti descensu, la vivienda llibre encadena un añu de cayíes interañales de precios, que nel segundu trimestre del 2009 fueron muncho más pronunciaes que nos dos anteriores. En concreto, nel cuartu trimestre del 2008 la baxada foi del 3,2% y nel primer trimestre del 2009 llegó al -6,8%.
 
Sobre'l trimestre anterior, el preciu de la vivienda llibre descendió un 0,9% nel tercer trimestre. Con estos descensos, el preciu de la vivienda llibre caltiénse nos niveles más baxos dende'l 2006.
 
La cayida de pisos nuevos (hasta dos años d'antigüedá) foi del 7,7% en tasa itnerañal y del 0,7% sobre'l segundu trimestre del 2009, quedando'l valor del metru cuadráu nos 1.911,1 euros. Nel casu de la viviendes de segunda mano, el preciu asitióse nos 1.890,5 euros, con un descensu intertrimestral del 1,4% y del 8,3% sobre'l tercer trimestre del 2008.
 
LA VIVIENDA PROTEXIDA SUBE UN 1,6% INTERTRIMESTRAL
 
Pela so parte, el metru cuadráu de la vivienda protexida asitióse nos 1.114,3 euros nel tercer trimestre, lo que supón un 0,8% menos sobre'l mesmu periodu del 2008.
 
Sicasí, en rellación al segundu trimestre del añu, estos precios esperimentaron un incrementu del 1,6%, acabando asina con dos trimestres siguíos de baxaes en términos intertrimestrales.
 
En total, l'Índiz xeneral de precios de la vivienda (llibre y protexida) esperimentó nel tercer trimestre un descensu del 7,8% en términos interañales, mientres qu'en tasa intertrimestral la reducción del Índiz foi del 0,9%.
 
Per otru llau, el númeru de tasaciones inmobiliaries pa realizar el cálculu de los precios de viviendes foi nel tercer trimestre del 2009 127.359 viviendes, un 8,7% menor que les realizaes nel segundu trimestre y un 2,3% más que les que se tasaron nel tercer trimestre del 2008.
 
LOS PRECIOS CAEN EN TOLES COMUNIDAES
 
El preciu de la vivienda cayó nel tercer trimestre nes 17 comunidaes autónomes. El mayor descensu interañal prodúxose, dempués d'Asturies, en Murcia (-11,6%), Aragón (-11,3%), Castiella-La Mancha (-11,2%), Cantabria (-10,4%), Baleares (-9,2%), Cataluña (-8,3%), Andalucía (-8,2%) y Navarra (-8%).
 
Perbaxo de la media nacional asitiáronse Galicia (-7,7%), Madrid (-7,1%), Comunidad Valenciana (-7%), Castiella y Lleón (-6,7%), País Vascu (-6,7%), Canaries (-4,4%), Estremadura (-2,5%) y La Rioxa  (-1,3%). En cambiu, Ceuta y Melilla rexistraron en conxuntu un descensu del 2,9%.