La Xunta pola Llingua pide a alumnos, pas y profesores que denuncien "les agresiones a los derechos del asturianu"

|

La Xunta pola Defensa de la Llingua Asturiana encamentó güei, al traviés d'un comunicáu a "a tolos estudiantes, families, trabayadores de la enseñanza y a cualquier persona que pueda tener información sobre agresiones a los derechos na enseñanza del asturianu, a que se pongan en contactu cola Xunta pola Defensa de la Llingua pa denunciar y actuar contra estos fechos".
   Según el colectivu, "viendo les torgues que se ponen de contino nos centros d'enseñanza, tanto de Primaria como de Secundaria, pa col enseñu del asturianu, la Xunta pola Defensa de la Llingua Asturiana fai un llamáu a tola xente que tenga conocimientu de casos nos que la opción llibre de cursar estudios d'asturianu la deniegue dalgún centru educativu".
   "Nos últimos díes", matizó'l comunicáu, "foi posible resolver un casu nun institutu de Xixón nel que se negaba la opción de cursar asturianu a dellos estudiantes que lu tuvieren pidío". "Depués de facer les xestiones correspondientes, foi posible iguar esta situación y qu'a lo último'l centru accediere a ufrir l'asignatura", esplicó. Sicasí, la organización dixo saber que "nun ye l'únicu casu y que en munchos d'ellos podríemos tar en condiciones d'actuar de lleganos la información en tiempu".
   Pa la Xunta, "la presencia del asturianu na educación ye marxinal y testimonial, dase una situación d'agresión continua a los derechos llingüísticos y educativos de los y les estudiantes, y un incumplimientu sistemáticu de la llexislación esistente n'Asturies nesti campu". "Esto traduzse en que", según la nota, "cursu tres cursu, niégase'l derechu a estudiar la llingua asturiana a miles de mozos y moces estudiantes que lo piden voluntariamente".

Comentarios

Cualquiera que tenga neños pequeños sabe lo que pasa en munchos colexos cuando a algún rapacín se-y escapa algo n'asturianu. Esi día más-y valía nun tener dío a clase. Pero nun se diz, nun se cuenta, ye ... "TABÚ"

Gabis

Contador Estadistiques