Areces anuncia la conxelación del sueldu de los altos cargos y diz qu'Asturies yá ta nel camín de la recuperación

El presidente del Principáu Vicente Álvarez Areces, anunció que'l presupuestu autonómicu pal añu 2010 va incluyir la conxelación salarial d'altos cargos. Según esplicó'l presidente asturianu nel trescursu del so discursu inicial nel Alderique d'Orientación Política que se celebra dende esti miércoles na Xunta Xeneral del Principáu, trátase del segundu añu sigíu nel que s'adopta la mesma midida. Tamién opinó que la comunidá ta yá nel camín de la recuperación de la crisis.

   El dirixente socialista foi enumberando les principales prioridaes que va tener el presupuestu rexonal de cara al próximu añu, que va caracterizase pola austeridá y un mayor control del gastu corriente.

   A xuiciu d'Areces, la decisión de volver conxelar el salariu de los altos cargos tien mayor relevancia, si se tien en cuenta que les retribuciones d'eses persones "alcuéntrense ente les más baxes d'España".

   Amás, esplicó que'l Principáu conxelará tamién la ufierta pública d'emplegu pa reducir los gastos corrientes, anque caltendrá los compromisos anteriores de les ufiertes públiques yá aprobaes, lo que va ayudar a "reducir la temporalidá" na Alministración Pública asturiana.

   Encualquier casu, el Gobiernu rexonal aplicará les midíes d'incrementu salarial ente los funcionarios que s'adopten dende l'Alministración Xeneral del Estáu.

   Los presupuestos del 2010, según Areces, nun supondrán una modificación de los impuestos, polo que'l dirixente rexonal descartó que vaya elevase la presión fiscal normativa n'Asturies. Apuntó que'l próximu añu va aplicase la primer vez el nuevu modelu de financiación y tendráse en cuenta la subida de la presión fiscal prevista pola Alministración Xeneral del Estáu. Ye dalgo que'l presidente rexonal considera "abondo pa nun alterar l'equilibriu ente la necesidá de más recursos y l'activación de la economía y del consumu". El Gobiernu tratará de caltener los beneficios fiscales aprobaos l'últimu exerciciu.

   Según el presidente, l'exe esencial del Presupuestu del 2010 será l'apuesta pola inversión dinamizadora de la economía. Resaltó'l papel de la inversión pública pa dar un puxu a la inversión empresarial, dinamizar l'actividá económica y xenerar emplegu.

   L'executivu caltendrá unes inversiones pal conxuntu del sector publicu superiores a los 1.000 millones d'euros. Como oxetivu fundamental, ta l'avance hacia un modelu productivu basáu na sostenibilidá, la innovación, la conocencia, les tecnoloxíes d'información y una educación de calidá, asina como la xeneración d'oportunidaes pa los que dexen de recibir prestaciones por desmplegu y la reactivación de la economía pa crear emplegu y de calidá.

NEL CAMÍN DE LA RECUPERACIÓN

   P'Areces "Asturies yá entamó'l camín de la recuperación, lo peor yá pasó, y alcontrámonos nel puntu d'inflexón pa la saida de la crisis". Dixo amás que'l Gobiernu asturianu ta combatiendo la crisis dende diferentes y dellos ámbitos, pero con "sacrificiu, ambición y consensu".

   Insistió en que'l Principáu "resiste meyor la crisis" y punxo sobre la mesa datos referentes al emplegu y a les afiliaciones a la Seguridá Social, qu'al so xuiciu son "innegables". Tamién mencionó los índices de producción industrial o los datos sobre'l turismu pa xustificar les sos afirmaciones.

   Indicó qu'esta meyor resistencia débese en gran midida a los efectos de les midíes anticrisis puestes en marcha pol Executivu, ente elles el Presupuestu del 2009 que foi'l "más inversor de la historia", y qu'amás foi posible gracies a la firma d'una alianza con IU-BA-Verdes que "goza de bona salú".

   Ente estes midíes anticrisis refirióse tamién a la concesión d'avales a empreses que permitieron "consolidar 5.000 emplegos", mencionó les ayudes a los autónoms y destacó "l'esfuerzu na consolidación del sector de la economía social".

   En materia de vivienda destacó'l puxu dau a la de proteición pública y aseguró que yá promovió la construcción de 1.711 viviendes de promoción pública de les que'l 84% yá tán en construcción.

FINANCIACIÓN Y MUSEL

   El presidente asturianu dixo tamién que les negociaciones de la financiación autonómica y de l'ampliación del puertu d'El Musel fueron les "más difíciles" que tuvo que llibrar na so vida política. "Ambes se resolvieron de manera beneficiosa pa nosotros", señaló.

   En rellación a El Musel, dixo que la solución que s'algamó pal modificáu impedirá que se paralice una obra fundamental pal futuru industrial y enerxéticu d'Asturies, gracies al acuerdu algamáu col Gobiernu d'España. "A naide-y presten los escesos de coste, a mí tampoco, pero nesti casu produxéronse una riestra d'imprevistos qu'alteraron la previsión inicial, como la imposibilidá de sacar el material de les canteres establecíes", dixo.

   Asina, ante esta situación señaló qu'había "dos opciones". O aprobar el modificáu o "entegar la obra a la mar", y que se "tragare" tolo invertío hasta'l momentu. Sin embargu, señaló que les perspectives actuales son que la obra acabe nel 2010, de manera qu'Asturies contará con un puertu pal sieglu XXI, competitivu nos tráficos marítimos y que va ser una "piedra angular" del futuru enerxéticu.

   No que se refiere a la financiación autonómica, Areces dixo que s'algamó un "importantísitmu acuerdu" pa la financiación de los servicios públicos. Esplicó que'l so Gobiernu caltuvo una posición "firme" dende lo primero, que tamién aprovecharon otres comunidaes autónomes.

   "Foi una negociaicón difícil, pero algamamos un acuerdu bonu pa los intereses d'Asturies", dixo. Esplicó que la posición del Principái foi la de nun aceptar nengún criteriu de nivelación parcial y tampoco l'esfuerzu fiscal del territoriu, cuestiones que nun apaecen nel documentu final", a pesar de les presiones d'otres comunidaes".

   Otres cuestiones que, según Areces, solucionaron estos meses y que son fundamentales p'Asturies son la fixación del 2012 como fecha de llegada del AVE a Asturies, el consensu col Gobiernu d'España sobre'l trazáu ente L.lena y Xixón, la superación de les dificultaes técniques pa que les grandes autovíes, la del Cantábricu y Uviéu-Salas-La Espina, tean acabaes nel 2011, o l'acuerdu con Fomentu pa incluyir nel PEIT la vía de La Espina-Ponferrad. Nesti puntu destacó tamién l'acuerdu pa firmar un conveniu pa que Fomentu execute'l túnel d'El Fitu, con una inversión aproximada de 200 millones, amás del compromisu de 28,6 millones p'ampliar y modernizar l'Aeropuertu d'Asturies.

CARRERA PROFESIONAL

   Tamién anunció que'l Gobiernu presentará'l próximu mes nel Parlamentu dos proyectos de Llei pa dar cobertoria llegal a los anticipos a cuenta de los emplegaos públicos, necesarios pa estender la carrera profesional a tolos funcionarios. La intención del Executivu asturianu ye qu'estes iniciatives llexislatives tean vixentes el 1 de xineru del 2010, si reciben l'apoyu de la Cámara.

   La midida, según señaló Areces na so intervención, da respuesta al compromisu del Gobiernu del Principáu de crear un itinerariu pa tolos emplegaos públicos asturianos, nun avance disimétricu hacia la carrera profesional, y resuelve la controversia provocada sobre la fórmula llegal que da cobertoria al pagu a cuenta realizáu.

   "Si ambes lleis reciben l'apoyu del Parlamentu, podemos asegurar qu'en trés meses tará reestablecíu dafechu'l marcu llegal pa tolos emplegaos públicos, según l'acuerdu plantegáu de primeres pol Gobiernu y pactáu coles organizaciones sindicales", añadió.

   Les dos iniciatives tán referíes al ámbitu de los funcionarios de l'Alministración Xeneral y al de los funcionarios docentes non universitarios. Nel casu de los docentes, el Gobiernu asturianu fizo un "esfuerzu especial" porque la so carrera profesional debe venir marcada col Estatutu Básicu de la Función Pública Docente.