Areces diz que la llegada de l'alta velocidá a Asturies produciráse nel 2012

|

El presidente del Principáu d'Asturies, Vicente Álvarez Areces, aseguró que l'alta velocidá llegará al Principáu nel 2012, tal y como comprometió'l ministru de Fomentu, José Blanco. Nesti sen, Areces indicó que "ye mui fácil facer calendarios porque lo difícil ye cumplilos", y añadió que "dalgunos calendarios ellaboraos en L.luarca --en referencia al ministru de Fomentu del PP, Francisco Álvarez Cascos-- nun se cumplieron".

   Areces manifestábase asina demientres la so intervención na sesión inaugural de les xornaes técniques 'Variante de Payares', que se celebren na Facultá de Xeoloxía de la Universidá d'Uviéu, y nes que la conferencia inaugural ofrezla'l responsable de grandes proyectos d'alta velocidá d'Adif, Luis María Pérez.

   El xefe del Executivu rexonal indicó que la construcción de la variante de Payares ye nun "símbolu" pal fin del aislamientu de la rexón, y supón una "apuesta de gran magnitú" del gobiernu d'España con Asturies, que dende hai años manifiéstase nel Presupuestu.

   "Cincuenta millones d'euros por kiómetru ferroviariu ye una apuesta clara del Executivu de Zapatero por Asturies", dixo Areces, qu'insistió en que nel 2012 l'alta velocidá llegará a la Pola de L.lena.

   Pero amás aseguró que "yá se ficieron los deberes" pa la llegada del AVE a Xixón y llogróse "un trazáu consensuáu y realista coles necesidaes d'Asturies", un llabor que nun yera nada fácil. Añadió que'l trazáu ente La Pola L.lena y Xixón, que va dividise nos tramos de La Pola L.lena-Olloniego; Olloniego-Uviéu y Uviéu-Xixón, va contar tamién con una importante inversión.

   Na mesma llinia pronuncióse'l delegáu del Gobiernu n'Asturies, Antonio Trevín, que demientres la so intervención destacó que la obra de la variante de Payares tien trés importantes vertientes que son la histórica, la complexidá técnica y l'alderique políticu que xenera, y añadió qu'esta última vertiente dexó de llau les dos anteriores.

DOTACIÓN PRESUPUESTARIA HISTÓRICA

   "Deberíamos sentimos arguyosos, y contar con una obra como ésta qu'ámas faise cola participación d'empreses españoles y con tecnoloxía propia", dixo Trevín, qu'indicó que la llegada del AVE a Asturies supón una inversión superior a tolo que costó l'autovía ente Portugal y Francia. "Falamos d'una dotación presupuestaria histórica", dixo Trevín.

   Pela so parte, el responsable de grandes proyectos d'alta velocidá d'Adif, Luis María Pérez, dedicóse a repasar los proyectos puestos en marcha por Adif n'España, resaltando la variante de Payares como "una de les aiciones más complexes dende'l puntu de vista de la inxeniería".

   Destacó amás l'altu volume d'inversión que conlleva, siendo'l mesmu superior a los 2.390 millones d'euros y presentando la obra como un "desafíu enorme".

Comentarios

Llegará munchu primero que la oficialidá, y munchu primero qu'un diputáu nacionalista llegue sentase nun escañu de la Xunta, que de pasar, espérase pa dientro cuatro o cinco glaciaciones o pa la próxima era xurásica

Gabis

Contador Estadistiques