El PP pidirá na Xunta Xeneral una comisión d'investigación pal escesu de coste d'El Musel

|

El presidente del PP d'Asturies y voceru del Grupu Parlamentariu Popular na Xunta Xeneral del Principáu d'Asturies, Ovidio Sánchez, anunció que'l so partíu va solicitar nel Parlamentu asturianu una comisión d'investigación sobre l'aumentu de coste financieru de les obres d'ampliación del Puertu d'El Musel, en Xixón. La decisión tomóse por unanimidá na Comisión Executiva rexonal del PP, según señaló Ovidio Sánchez nuna rueda prensa ofrecida n'Uviéu xunto a los diputaos rexonales Joaquín Aréstegui y Fernando Goñi.

   Sánchez esplicó que la última declaración del ministru de Fomentu, José Blanco, nel Congresu, a entrugues de la diputada Pilar Fernández Pardo, dexó claro que la xestión de les obres ye responsabilidá de l'Autoridá Portuaria, onde los responsables son nomaos pol Gobiernu autonómicu.

   Asina, consideró necesaria una comisión qu'investigue tolos detalles del escesu de coste, asina como les responsabilidaes polítiques que puean derivase de la xestión financiera, con fondos públicos del proyectu. Sánchez señaló qu'hai cuestiones qu'esclarar, como una carta de renuncia del Gobiernu sobre un segundu pagu per parte de la Unión Europea, siempre y cuando se-yos garantice que nun van tener que devolver el primer pagu.

   Retrucó al presidente del Principáu d'Asturies, Vicente Álvarez Areces, que'l PP siempre quixo que s'executare l'ampliación, y señaló que'l so partíu foi precisamente'l que punxo en marcha'l proyectu. Amás, recordó a Areces que fueron los socios del Gobiernu de los socialistes, Los Verdes, los que presentaron una denucnia ante la Comisión Euroepa pol aumentu de coste.

   El voceru del PP na Xunta dixo qu'espera que la iniciativa pola que presenta la Comisión d'Investigación tea apoyada por otres fuerces polítiques, incluyida IU y PSOE, pa treslladar una imaxe de "tresparencia" sobre la xestión del proyectu.

   Les obres d'ampliación d'El Musel axudicóles l'Autoridá Portuaria de Xixón al UTE Dique Torres en 580 millones d'euros en febreru del 2008, con un periodu d'execución de 48 meses. Sin embargu, n'avientu del 2007 acordóse una modificación del contratu, con un escesu de coste de 217 millones (sin IVA). D'esta cantidá, 163,4 millones debíense al preciu de los materiales, 35,2 millones a meyores técniques y 11,4 millones a "foles fuera de lo normal".

   Ante esta situación, el Gobiernu d'España solicitó a la Unión Europea 135 millones a cargu de los fondos europeos. La comisión Europea, sicasí, denegó esta cantidá argumentando que nun s'axustaba a la llexislación vixente.

   En vista d'estes circunstancies, el ministru de Fomentu, José Blanco, garantizó nel mes de xunetu que va haber a lo último financiación pa l'amplación del puertu, recurriendo a un préstamu de 215 millones d'euros concedíu por Puertos del Estáu a l'Autoridá Portuaria, una partida que va incluyise nos Presupuestos Xenerales del Estáu (PXE) pa 2010.

Contador Estadistiques