El PP esixe al Principáu que llibre a los asturianos de la "humillación" derivada del "monopoliu" nes rutes aérees

|

El diputáu del PP na Xunta Xeneral del Principáu d'Asturies, Juan Ángel Bustillo, esixó al Gobiernu asturianu que llibre a los asturianos de la "vergoña" y la "humillación" que supón el "monopoliu" d'Iberia, nes llinies aéres del Aeropuertu d'Asturies con Madrid. Bustillo señaló que'l so grupu parlamentariu yá presentó entrugues nesti llinia y anunció que va siguir presentando iniciatives parlamentaries pa presionar al Executivu y que busque alcuerdos con compañíes de baxu coste.

   El fechu de que sólo seya Iberia la qu'ofrez conexones ente Asturies y Madrid supón, pa Bustillo, una reducción competitiva p'Asturies, y que los ciudadanos tean suxetos a unos precios y horarios que nun tienen por qué ser los meyores.

   Asina, dixo que pa un ciudadanu de Cantabria ye 234 euros más barato treslladase a Madrid que pa un asturianu. Lo mesmo pasa, según el PP dende Galicia, onde'l preciu del billete ye de 174 euros más baratu que n'Asturies. "Los viaxeros que faigan la ruta Asturies-Madrid paguen nun día un escesu de coste que ronda los 200.000 euros", comentó nuna rueda prensa ofrecida n'Uviéu.

   El diputáu cusó al Gobiernu del Principáu de "desidia" y afirmó que l'Aeropuertu d'Asturies rexistró un descensu nel númberu de viaxeros, hasta en temporada alta, mientres qu'en Cantabria aumentó tolos meses.

   Bustillo tamién reclamó al Gobiernu qu'aumente les conexones aéres con destinos estatales y internacionales. Sicasí, acusó a los socialistes de nun tener voluntá política pa resolver esti asuntu n'Asturies, y comentó que'l ministru de Fomentu, José Blanco, anunció l'entamu d'un comité de desarrollu de rutes aérees pa diferentes comunidaes autónomes, ente les que nun s'alcuentra Asturies.

   "Los asturianos tán sufriendo un agraviu y una discriminación", llamentó Bustillo, mientres consideró "urxente" que'l Gobiernu solucione'l "aislamientu" d'Asturies, dao que ye "la rexón del norte que cuenta coles comunicaciones menos competitives".

Comentarios

Pa qué?? si equí ya nos llantaron l'AVE. Tenemos lo q merecemos, namás.

Contador Estadistiques