El Gobiernu asturianu concede oficialmente les Medayes d'Asturies

El Gobiernu asturianu ta acabante d'aprobar la concesión de les "Medayes d'oru y plata d'Asturies 2009", unos galardones que quieren dsitinguir a persones o colectivos representativos del nuesu país y que s'entreguen nuna ceremonia coincidiendo coles celebraciones del Día d'Asturies. Una d'estes distinciones, la medaya de plata, va dir pal míticu grupu Nuberu. estos galardones fueren propuestos n'agostu pasáu.
 
El grupu Nuberu, formáu por Manolo Blanco Peñayos y Chus Pedro Suárez, asoleyara yá en 1978 el so primer discu "Asturies, ayeri y güei", y que va dos años anunciaron la so disolución, siendo una referencia pa la cultura, la música, y el idioma del país.

Per otru llau concédense dos "Medayes d'oru". Una va pa Aurelio Menéndez Menéndez, ex-ministru, conseyeru d'Estáu, caderalgu y abogáu xixonés, mientres que la otra va recibila José Ramón Fernández Álvarez, vicepresidente de Cuba d'orixe asturianu.

En cuanto al restu de "Medayes de Plata", distinguen a l'alpinista Rosa Fernández, a José Joaquín Barluenga Mur, caderalgu de Química Orgánica Universidá d'Uviéu, al restaurante Casa Consuelo d'Outur, a l'Asociación de Amigos de la Ría de Navia y a l'Asociación Asturiana de Empresa Familiar.