El PP asegura que n'Asturies hai 23.000 persones que nun cobren nenguna prestación

La diputada del PP na Xunta Xeneral del Principáu, Inmaculada González, aseguró que n'Asturies hai 23.000 persones que nun cobren nengún tipu de sovención y destacó que los 22 millones previstos nel presupuestu del 2009 "nun son abondo pa los 20.000 beneficiarios del salariu social básicu".

   González realizó estes manifestaciones demientres la rueda de prensa qu'ofreció güei na Xunta Xeneral del Principáu sobre la política social del Gobiernu rexonal y la so incidencia nes families  del Principáu.

   La responsable del PP en materia del Bienestar Social señaló qu'en xunetu del 2009 había n'Asturies 59.708 paraos, de los que 23.000 nun cobren nengún tipu de sovención. Nesti sen, González mostróse "preocupada", dao que nestos 23.000 paraos "tampoco van cobrar los 420 euros del Gobiernu central al tar fuera del mercáu llaboral dende enantes de 1 d'agostu".

   "Si'l Salariu Social básicu ye una llei que contempla un derechu soxetivu, nun pue ser que n'Asturies haya 23.000 persones que nun cobren nengún tipu de prestación", añadió la diputada 'popular'. Poro, el PP calificó de "escasos" los 22 millones d'euros previstos pa cubrir el Salariu Social n'Asturies.

   Nesti sen, González acusó a la Conseyería de Bienestar Social y Vivienda del Principáu de "tapecer" los datos en rellación a la Llei del Salariu Social Básicu. Los populares reclamaron, sin respuesta, la rellación de solicitúes presentaes dende'l primeru d'ochobre del 2008 al 30 de xunu del 2009, detallando sexu, y edá del titular.

   De la mesma manera, el PP pidió la rellación de les prestaciones concedíes dende'l primeru d'ochobre del 2008 al 30 de xunu del 2009, detallando'l conceyu, sexu y edá del titular, númberu de miembros de la unidá de convivencia en cada casu y cuantía de la prestación.

   González señaló que'l PP va pidir la comparecencia na Xunta Xeneral de la conseyera de Bienestar Social y Vivienda, Noemí Martín, y al conseyeru d'Industria y Emplegu, Graciano Torre, pa que "apurran la información solicitada".

   Pela so parte, la diputada del PP na Xunta Xeneral del Principáu, Elma Alonso, va solicitar a la Conseyera de Bienestar Social y Vivienda la rellación de places residenciales concertaes dende ochobre del 2008 a xunu del 2009, detallando l'área y coste de la plaza concertada.

   Alonso va solicitar tamién a la llista d'espera p'acceder a una plaza residencial n'aplicación de la llexislación vixente, detallando l'Ayuntamientu, sexu y edá del solicitante, y fecha de la solicitú.

   La diputada del PP señaló que n'Asturies hai 1.537 persones mayores na llista d'espera de les que 1.188 son persones con dependencia.