Rafael Palacios presentó l'Alcuentru de Pueblos Indíxenes entamáu pola Axencia Asturiana de Cooperación

|

El direutor de l'Axencia Asturiana de Cooperación al Desarrollu, Rafael Palacios, presentó en rueda prensa l'Alcuentru de Pueblos Indíxenes: Cosmovisión y Resistencia, que ye "una prioridá tresversal y sectorial" de la cooperación asturiana contemplada nel Plan Direutor 2009-2012.

   Pa l'Axencia de Cooperación esti alcuentru quier reconocer el derechu que tienen los pueblos indíxenes a esistir como pueblos estremaos, a definir y a poner en práutica los sos propios modelos de desendolcu.

   L'alcuentru desendolcaráse los vinientes 16, 17 y 18 de setiembre nel Palaciu'l Conde Torenu asitiáu na Plaza Porlier d'Uviéu y sedrá inaguráu pola conseyera Bienestar Social y Vivienda, Noemí Martín y el propiu direutor de l'Axencia Asturiana de Cooperación al Desendolcu, Rafael Palacios.

   El miércoles 16 de setiembre inauguraráse la esposición 'L'arte la tintorería en San Xuan La Llaguna. Guatemala' que finará'l día 25 del mesmu mes. Al empar, dende les 18 hores proyectaráse la película 'Apaga y vámonos' del direutor catalán Manuel Mayol y sedrá presentada por Javier Arjona, miembru de la ONGD 'Soldepaz Pachakuti', acordies colo qu'informó Palacios.

   Pal xueves, tamién a les 18 hores, habrá una dedicación especial a los testimonios de dellos protagonistes de la cosmovisión indíxena, ente los que s'atopa l'abogada del pueblu Kichua y exministra d'Asuntos Esteriores d'Ecuador, Nina Pacari y el miembru de la Converxencia Nacional Maya Waqib'kej, Daniel Pascual. Esti alcuentru sedrá presentáu y moderáu por Xosé Firmu García Cosío, trabayador del Serviciu de Normalización Llingüística del Conceyu Siero.

   A lo cabero, na tarde del vienres 18, los protagonistes sedrán Aida Quilcué del pueblu Nasa y candidata al Senáu de la República Colombia pol Movimientu Social Indíxena y Domingo Marileo del pueblu Mapuche, presidente de l'Asamblea Nacional Mapuche d'Izquierda. Alcuentru que sedrá presentáu y moderáu por Pablo Gutiérrez Vega, profesor asturianu asociáu d'Historia'l Derechu y les Instituciones de la Universidá de Sevilla.

   Rafael Palacios destacó que se sofitarán proyeutos ya intervenciones qu'incidan direutamente sobre aspeutos rellacionaos cola promoción del multiculturalismu, la defensa de los derechos sociales y el respetu a la identidá cultural.

   "Tenemos munchos proyeutos rellacionaos colos pueblos indíxenes n'América llatina, Ecuador, Colombia y Bolivia, mesmamente cola recoyida de la tradición oral de pueblos d'Arxentina", señaló Palacios y amestó que más d'un millón d'euros se destinaron a trabayos rellacionaos con pueblos indíxenes.

   El direutor de l'Axencia Asturiana de Cooperación al Desarrollu esplicó tamién, qu'hai proyeutos rellacionaos con pueblos indíxenes que tamién son competencia de Mediuambiente o de Xéneru.
 

Comentarios

Ensin comentarios

Gabis

Y los horros tirándolos

Gabis

Nel últimu añu perdiéronse n'Asturies más de 20.000 puestos de trabayu.
Más de la mitá de los trabayadores asturianos son mileuristes.
Siguen pesllando empreses a embute y aumentado'l paru.
La xente sigue ensin poder utilizar l'asturianu en cualquier ámbitu n'Asturies.
Siguen cometiéndose atentaos contra'l nuestru mediu natural.
El Gobiernu Asturianu va devolver perres al central porque nos sobren.
La reforma l'Estatutu parada indefinidamente...
............................................................................................
............................................................................................
 

Contador Estadistiques