BA refuga'l copagu sanitariu y UNA califica de "llamentable" l'actitú de PSOE y IU

|

El portavoz del Bloque por Asturies, Pablo Fernández, refugó cualesquier fórmula que quixere introducir na sanidá asturiana un sistema de copagu y defendió un "sistema sanitariu universal". Pela so parte Unidá Nacionalista Astuiana, al traviés del so portavoz Faustino Zapico, señaló que "ye insultante" abrir el debate sobre la financiación sanitaria depués de "zarrar el modelu de financiación autonómica".

Dende'l Bloque por Asturies conseñóse que "lo que deberíen facer los xestores de la salú ye facer frente a la burbuya farmacéutica existente, cola que tan ganando muncho dineru un bon númberu de llaboratorios, provocando un gran gastu a l'Alministración". Asimesmo añadió qu'en cuentes de cuestionar el modelu sanitariu, lo "qu'hai que facer ye meyoralu" y nun puede ser un "sacu ensin fondu pa los presupuestos", pero señalando que "nun ye de recibo que s'intente xestionar la sanidá con criterios más propios d'una empresa privada".

Unidá Nacionalista Asturiana acusa a PSOE y IU de dar un "espectáculu llamentable"

Pela so parte UNA calificó de "llamentable l'espectáculu que tán dando PSOE y IU cola financiación sanitaria" porque "lloñe de guetar soluciones tan faciendo un espectáculu empobináu a satisfacer a les sos 'hinchaes' y despreocupándose de los ciudadanos asturianos”.
 
Pa Faustino Zapico ye "evidente que la pésima xestión de los fondos públicos y el marafundiu de los últimos años fecho por PSOE y IU acabaría dañando a la viabilidá de los servicios públicos esenciales”, y considera que ye “increíble qu'una Comunidá Autónoma que nun executa los proyectos de los Fondos Mineros, qu'aumenta los cargos públicos escoyíos a deu de forma inxustificada como dixeren los tribunales y la Sindicatura de Cuentes y con un grau d'oscurantismo enorme na xestión en tolos 'chiringuitos' dependientes del gobiernu asturianu, s'atrevan a anunciar la falta de fondos pa servicios públicos”. Finalmente'l portavoz d'UNA desixó “responsabilidá a los dirixentes del PSOE y IU”.

 

Contador Estadistiques