Xera espubliza "Tierra", el so segundu trabayu discográficu

El grupu folk asturianu Xera, saca al mercau´l so segundu trabayu discográficu, tituláu "Tierra". Tres el primeru, "Lliendes", asoleyáu en 2006, Xera ufierta "una evolución na so llínia musical, ampliando los temes con voz y amestando nuevos instrumentos como la zanfona".Esti trabayu preséntase baxo llicencia Creative Commons by-nc-nd 3.0

La presentación d´esti nuevu proyeutu del grupu Xera va ser el dia 23 del prósimu septiembre nel Teatru de la Universidad Laboral de Xixón a les ocho la tarde. Los temes son creaciones orixinales del grupu, a esceición d´una adautación del tema popular “Xilguerín Parleru”, y el recursu melódicu estrayíu d´una Cantiga d´Alfonso X, nel cantar “Natura”. Pa esti trabayu cuntaron col sofitu de Lluis Álvarez “Texuca”, escritor y filósofu asturianu, como  narrador nún de los cantares; nel tema L'Anduriña recueyen la voz del so protagonista orixinal. Esti trabayu, nueve pistes en total, plantega ser "una reflexón, musical y novedosa, so la rellación del ser humanu cola Tierra".

Lo mesmo que nel trabayu anterior del grupu, preséntase baxo llicencia Creative Commons by-nc-nd 3.0 y la so distribución cuerre a cargu de la discográfica Santo Grial. Puede mercase en tiendes y otros llugares, asina como ser llibremente descargáu al traviés de la páxina web del grupu en formatu Vorbis y MP3.