Areces recuerda que'l Gobiernu de Castiella y Lleón dio'l so apoyu a la llinia de Sama-Velilla

|

El presidente d'Asturies recordó que'l so gobiernu y el de Castiella y Lleón "fueron nel so momentu al Ministeriu d'Industria, onde confirmaron públicamente'l so apoyu a la llinia d'evacuación de Sama-Velilla, por interés xeneral de les dos comunidaes y d'España". Dixo amás que pela so parte Rede Eléctrica, faciendo les correiciones necesaries, meyoró'l trazáu de la llinia, y agora'l Gobiernu asturianu va siguir defendiendo incuestionablemente l'interés públicu que tien que prevalecer sobre cualquier otru.

   Areces manifestábase asina nuna entrevista concedida a Onda Cero al entrugalu pola oposición de la Diputación de Lleón a la llinia d'evucación enerxética.

   "Caún mira pa sí mesmu con unos intereses bastante cortos en cuanto a les necesidaes del nuesu país. De magar de la planta de regasificación que se va instalar n'El Musel, ta plantegándose un proyectu enerxéticu al conxuntu d'España y d'Europa. Si tol mundu ficiere lo mesmo díbemos volver non yá al sieglu XIX, sinón casi a la prehistoria", dixo Areces.

   El presidente rexonal manifestó que naide quier que les llinies d'evacuación o les carreteres pasen al so llau, pero encambiu tol mundu quier qu'haya lluz na so casa, nes empreses, enerxía p'abasteceles, carreteres pa comunicase bien y demás.

   Entrugáu pola concesión del creitu per parte de Puertos del Estáu al puertu de Xixón, p'asumir los escesos de coste de la obra, Areces indicó que "el creitu anunciáu ye la meyor solución de les posibles".

   "¿Saben ustedes cuál diba ser la meyor solución? Qu'un grupu políticu asturianu nun presentare la denuncia y Europa nun punxere impedimentos. Asina podíemos cobrar los fondos europeso como taba programáu pol Gobiernu d'España, pol d'Asturies y por toos", dixo Areces.

   Esplicó amás que los escesos de coste orixináronse porque la previsión inicial de que s'estrayere material de les canteres próximes a El Musel nun pudo cumplise, dao que tou esi espaciu ocupólu una empresa que tenía la titularidá de les canteres pa facer otra obra y esta incidencia, non prevista inicialmente, provocó que'l material hubiere que buscalu lloñe d'esta zona y aumentó'l coste del tresporte.

   Demientres, la entrevista Areces refirióse tamién a la carrera profesional de los funcionarios y aeguró que tal y como prometió nel Parlamentu, va continuar alantre porque ye "la so vocación facelo asina". "Fízose primero pa unos sectores concretos de la sanidá, llueu estendímosla a tola sanidá porque había una llei, a continuación aplicámosloa como anticipu a tola Alministración asturiana y hubo una sentencia que mos va permitir correxir l'enfoque que ficiéremos, pero l'enfoque va siguir siendo'l mesmu: queremos que tolos emplegaos públicos que cumplan unos requisitos apropiaos puean caltener esi cobru y dempués yá, al traviés del desarrollu d'una Llei de Función Pública, normalizar esa situación", dixo.

   Respeuto a los presupuestos del 2010, Areces indicó que nunca dixo que nun fueren a caltener polítiques sociales, más bien al revés. Pero afirmó qu'hai que ser realistes "y nun se pue tar ayenos a lo que ta asocediendo nel restu d'España y d'Europa".

   "Tamos dispuestos a endeudamos pa caltener les inversiones, pero ye evidente que'l gastu corriente tien qu'acomodase a los ingresos corrientes pa que se caltenga un aforru y una estructura presupuestaria que nun ponga en riesgu'l futuru", dixo.

Comentarios

D'esti homón engafiéntame tolo que diz.

Contador Estadistiques