Trevín anuncia que'l proyeutu del nuevu puente sobre'l Sella va presentase en xineru

|

El delegáu del Gobiernu, Antonio Trevín, visitó güei les obres que nesti momentu executa la Demarcación de Costes en Ribesella. Trevín tuvo acompañáu del xefe de la delegación territorial de Costes, Ramón Galán, l'alcalde de Ribesella, Ramón Canal y dellos conceyales del Ayuntamientu ribesellán. Demientres la visita, Trevín anunció que'l proyeutu del nuevu puente va presentase en xineru.

Costes ta realizando obres de reforzamientu del paséu de la playa llocal de Santa Marina que va subir a 543.000 euros. Con esta obra pretende dotar a esta infraestuctura de resistencia bastante pa soportar les fuertes foles del arenal, que nel últimu temporal provocaron el fundimientu d'una parte del paséu y graves deterioros na estructura del mesmu.

El delegáu anunció que los vecinos de Ribesella van conocer en xineru del 2009 el proyeutu del nuevu puente, dao que l'actual ta ye poco operativu yá pol crecimientu del conceyu. "En xineru vamos tener el proyeutu y vamos presentalu de manera oficial. Dempués van venir el restu de procedimientos como l'axudicación y subasta pública de les obres", sorrayó Trevín, que nun afondó nel conteníu del proyeutu nin tampoco se refirió a la posibilidá de valtar o dexar l'actual.

Dalgo que tamién quiso dexar claro l'alcalde de Ribesella, Ramón Ganal, demientres la so intervención, ye que "lo importante ye que nunca se dexó de trabayar pa llograr esta importante infraestructura pa Ribesella y que pronto va conocese'l proyeutu del puente y tolos detalles".

Otra actuación que pronto va executase nel territoriu ribesellán ye la meyora de la playa d'Arra. Esti arenal ta peslláu al públicu dende hai dos años pol argayu de la última parte del so accesu.

Contador Estadistiques