Per otru llau, el ministru de Fomentu, José Blanco, anunció que'l próximu llunes va aconceyase col presidente del Principáu d'Asturies, Vicente Álvarez Areces y van buscar una solución conxunta a los aumentos de coste nes obres de meyora del Puertu d'El Musel, en Xixón. El ministru nun quiso entrar en detalles porque aseguró que "vio yá demasiaes especulaciones" y nun quier "alimentar más".

   Blanco manifestábase así en declaraciones a los medios demientres la firma de convenios pa recuperación de patrimoniu históricu en delles comunidaes autónomes, nos que va invertir diez millones d'euros con cargu a los fondos xeneraos pol 1% cultural.

   El ministru recordó que'l so compromisu col proyectu d'ampliación d'El Musel ye'l de coparticipar na decisión y buscar la meyor alternativa, compromisu que caltién porque "l'autoridá portuaria ye la competente nesti casu", y el ministeriu forma parte d'ella porque ta nel Conseyu d'Alministración.