Cinco bandes de gaites y el campeón del mundu de percusión Jim Kilpatrick tarán esti sábadu nel festival de Villaviciosa

Seis bandes de gaites, ente les que tará la formación del 16 veces campeón mundial de percusión escocés Jim Kilpatrick, van tomar parte esti sábadu nel Festival de Bandes de Gaites de Villaviciosa, estamáu pola formación de la población maliayesa, qu'esplicaron que "esti añu'l festival va a ser un homenaxe a la figura del tamboriteru, tantes vegaes escaecida na hestoria de la música tradicional asturiana". Por esti motivu destaca la presencia del percusionista escocés, qu'ofrecerá una 'Master Clas' nel Teatru Riera de magar les 12.00 hores.

   De tarde, tendrá llugar a les 19,00 hores un desfile peles diferentes cais de Villaviciosa y a les 20,00 hores entamará'l conciertu na plaza del Ayuntamientu. L'espectáculu va presentalu'l músicu Hector Braga. El recital va incluyir un solu de percusión en conxuntu de toles bandes participantes.

   Les formaciones presentes en Villaviciosa serán Banda de Gaitas Nova Fronteira & Cartelle (Ourense), Banda de Gaites Llariegu (Asturies), Banda de Gaitas Pedro Soler ( Murcia-Lorca), Banda de Gaites Villa de Xixón (Asturies), Banda Gaites Villaviciosa (Asturies) y la Jim Kilpatrick MBE (Escocia).

   Depués del conciertu va celebrase una espicha na Plaza d'Abastos de Villaviciosa, a la que van asistir los 180 músicos participantes y toes aquelles persones que lo deseen. La entrada pa la espicha cuesta 16 € y pue mercase na Sidrería la Ballera, na Sidrería la Espicha y na Cervecería la Bodega II.