UXT y CC.OO nun descarten recurrir el fallu de la carrera profesional

Los sindicatos UXT y CC.OO pidieron al Principáu aprobar "lo primero posible" la Llei de Función Pública que dea amparu normativu al desarrollu de la Carrera Profesional y al pagu de los complementos con ella rellacionaes. De nun ver "voluntá política" per parte del Executivu, nun descarten recurrir ante'l Tribunal Supremu la sentencia del Tribunal Superior de Xusticia d'Asturies. Pela so parte Unidá Nacionalista Asturiana, como parte demandante nesti procesu, desixó "respetu a la llegalidá y responsabilidaes a los qu'apoyaron esti despropósitu".

   Dambos sindicatos solicitaron un conceyu de la Mesa Xeneral con carácter de "urxencia" p'analizar la situación, asina como caltener alcuentros col Gobiernu p'apellar a la "responsabilidá" del Executivu y "presionar pa qu'haya una cobertoria normativa cola mayor rapidez posible".

   Asina lo dixeron n'Uviéu nuna asamblea informativa conxunta, ante dalgo más de mediu centenar d'emplegaos públicos, el secretariu d'Aición Sindical de la Federación de Servicios Públicos d'UXT, Luis Ángel Ardura, y el responsable de la Negociación cola Alministración Pública de la Federación de Servicios a la Ciudadanía de CC.OO, Manuel Nieto Álvarez.

   Ardura calcó en que va pidise a l'Alministración que "con carácter inmediatu" solucione esta situación "con responsabilidá, porque ellos firmaron l'acuerdu", y que "lu pongan llegalmente como tien que tar". "De nun ser asina, igual mos vemos empobinaos a tener que facer otres midíes, a lo meyor non de presión, pero sí pa impugnar la sentencia, lo que diba llevamos cuatro o cinco años nel Supremu", apuntó.

   Nesti sen, el responsable sindical d'UXT señaló que "naide pue asegurar agora mesmu que si nun recurrimos la sentencia nun tengamos que devolver el dineru, porque nel momentu en que seya firme'l fallu, el 1 de xunetu, el Tribunal de Cuentes pue dicir qu'hai que devolver el dineru". "Otra cosa ye que recurramos a lo que'l Tribunal de Cuentes entiende, pero en cualquier manera, la espada tenémosla enriba", añadió.

   Ardura apostó por una solución "menos traumática" que diba suponer una llei de carácter urxente al Parlamentu, teniendo una proposición non de llei y una moción d'apoyu de los otros grupos parlamentarios. D'esta manera, considera que si eso nun se produz ye que "falta voluntá política", que "igual" diba obligar a UXT y CC.OO a "recurrir la sentencia".

   Pela so parte, Manuel Nieto calificó de "llocura sindical" la denuncia realizada por Suatea, CSIF, USO y CSI, a los que llamó "irresponsables" y calcó en que nenguna federación nin seición de CC.OO participó. Dambos sindicalistes dixeron que los emplegaos públicos pidan "responsabilidaes" y "esplicaciones" a los sindicatos denunciantes por dexar de recibir esos complementos.

   Amás, Nieto remarcó que CC.OO y UXT y van entamar tolos medios de "vía política" pa buscar soluciones lo más rápides posibles pa que "seya'l menor tiempu posible", el que los emplegaos tean sin cobrar esos complementos cobraos hasta agora como pagu a cuenta.

   Tamién comentó que l'Alministración debía de ser "más áxil" nel desarrollu de la Llei de la Función Pública, al recordar que l'acuerdu pal desarrollu de la Carrera Profesional firmóse en Mesa Xeneral de Negociación el 27 d'avientu del 2006.

   Na asamblea na que participaron unos 70 emplegaos públicos, los responsables sindicales llamentaron la falta d'asistencia ante una situación qu'afeuta a más de 14.000 trabayadores de l'Alministración qu'en xunetu van dexar de recibir los pagos. Demientres la sesión hubo momentos de tensión y poques intervenciones, centraes na rocea sobre'l pagu de les mensualidaes y los plazos pal desarrollu de la llei.

   Ente los asistentes tuvo ún de los lletraos del Serviciu Xurídicu del Principáu, Xurde Blanco, qu'apuntó que la sentencia del TSXA anula la resolución de la Conseyería d'Economía y Alministraciones Públiques, pero caltién l'acuerdu del Conseyu de Gobiernu, polo qu'entiende que pue recurrise pa caltener el 'pagu a cuenta'.

UNA critica a UGT y CC.OO

Pela so parte Faustino Zapico,voceru d'UNA, manifestó'l so ablucamientu énte les declaraciones que tán faciendo UGT y CCOO, llamando irresponsables a "los demandantes nesti procesu, que como UNA nun quieren otra cosa que l'Alministración Pública tea dientro de la llegalidá" lo que ye básico "pa garantizar una función pública democrática y non venceyada a l'arbitriariedá de los nuestros políticos, de lo que ye exemplu la carrera profesional aprobada pol Gobiernu asturianu cola complicidá d'UGT y CCOO".

Pal voceru nacionalista "la demagoxa sobre esti tema que tán faciendo UGT y CCOO nun pue tolerase, porque aprobaron una carrera profesional que yá sabíen que yera illegal y que cuntaba col refugue de los más de los funcionarios" y nun ye asumible "dicir qu'ellos defenden los intereses de los funcionarios, cuando queríen ponelos al serviciu de los políticos a cambiu de recompenses illegales".