IU acusa al PSOE de "deslleal al volver incumplir" el pactu de Gobiernu coles ayudes a la compra de llibros

El diputáu del grupu parlamentariu d'IU-BA-Verdes Francisco Javier García Valledor aseguró güei nun entender por qué'l PSOE "ye deslleal y incumple de nuevo dalgunos acuerdos incluyíos nel pactu de gobiernu ente dambes formaciones". Valledor refirióse a l'aprobación, per parte del Conseyu de Gobiernu, de la llinia d'ayudes a la compra de llibros de testu que sigue les mesmes bases d'anteriores convocatories y nun recueye'l carácter progresivu reclamáu por IU y incluyíu, según el diputáu, nel pactu.

   En rueda de Valledor aseguró que los conseyeros de la formación --Noemí Martín y Aurelio Martín-- mostraron nel Conseyu de Gobiernu la so oposición a la midida con eses bases y esplicaron la propupesta de la coalición, pero "a pesar d'ello aprobóse".

   "Consideramos que ye un fechu grave dao que tamos ante un nuevu incumplimientu de lo acordao nel Pactu de Gobiernu nel que se recueye l'ampliación del criteriu de carácter progresivu de les ayudes que se concedan, tanto les de natalidá como nesti casu les dirixíes a la compra de llibros de testu", dixo Valledor, que calcó en que van llevar esti asuntu a la próxima xunta de siguimientu del pactu qu'espera que se celebre nel mes de xunetu.

   Insistió en que la convocatoria nun recueye esi criteriu y poro "de manera inxusta" ofreza la mesma ayuda a toles families con rentes inferiores a les 60.000 euros añales.

   Frente a esa posición, IU defende que les ayudes "seyan mayores pa los que menos ganen", y asina propunxo, a mou d'exemplu, ayudes d'hasta 300 euros pa les rentes de menos de 10.000 euros; de 200 a 250 euros pa les rentes d'ente 10.000 y 30.000 euros, y de 50 a 100 pa les de más de 30.000 euros.

   "Pienso que nun ye xusto que se dea lo mesmo a una familia en paru con trés fíos qu'a una familia que cobra 60.000 euros al añu con un fíu", dixo'l diputáu de la coalición, que recordó que ye'l mesmu criteriu que pidíen pa les ayudes a la compra d'ordenadores --yá acabaes--, o que piden pa les ayudes a la natalidá.

   Sobre estes últimes, recordó que la Conseyería de Bienestar Social presentó una propuesta al Conseyu de gobiernu "que, según paez, nun tuvo aceptación".

   Valledor pidó amás otros cambios na convocatoria d'ayudes a la compra de llibros de testu, al considerar más apropiao que s'ofreza un vale cambiable nes llibreríes y non un ingresu a cuenta. Nesti sen, insistió en qu'al so grupu-y costan que munches families usen esa ayuda con otros fines, dalgo que sospecha que se dea tovía en mayor midida na actual situación de crisis.

RIOPEDRE

   El conseyeru d'Educación, José Luis Iglesias Riopedre, señaló nesti sen, en declaraciones a los medios tres la firma d'un conveniu cola Asociación Contra l'Acosu Escolar (ACAE), que la convocatoria "ye un tema aprobáu pol Conseyu de Gobiernu, nel que tán presentes dos miembros d'Izquierda Xunida", y añadió que na mesma caltiénse'l tope de 60.000 euros d'ingresos pa poder beneficiase.

   Insistió en que cuando s'aprobó la midida taben presentes los dos conseyeros d'Izquierda Xunida y destacó que les unidaes familiares con ingresos superiores a los 60.000 euros nun van tener esa ayuda y el restu sí.