L'ALLA recupera'l cursu d'Ecoloxía y estrena otros dos pa filólogos y profesores de gallego-asturianu

L'Academia de la Llingua Asturiana va recuperar esti mes d'agostu, na XXVII edición de los sos cursos de branu, el d'Ecoloxía y Mediu Ambiente, amás de crear dos nuevos títulos, destinaos a la formación de filólogos en xeneral y de profesores de gallego-asturianu.
 
Son les novedaes principales de la edición d'esti añu, que se va desarrollar demientres les dos primeres selmanes d'agostu na Escuela Hogar de Santantolín d'Ibias, y que presentaron oficialmente en rueda la presidenta de l'Academia, Ana Cano, el director de programación de los cursos, Xosé Antón González Riaño, y el responsable del cursu d'Ecoloxía y ayalgueru de l'Academia, Carlos Lastra.

   Hai cuatro años que nun s'ufiertaba'l cursu d'Ecoloxía y Mediu Ambiente que, según Cano y el propiu Lastra, muncha xente solicita tolos años que se faiga. Esti añu va tar orientáu a trés temátiques: los espacios naturales y especies protexíes d'Asturies, el desarrollu enerxéticu na comunidá y la construcción d'infraestructures. Lastra esplicó que'l cursu pretende que los asistentes tengan una visión "crítica" y "reflexiva" sobre la necesidá de qu'Asturies seya la productora d'enerxía pa tol Estáu y sobre la "obsesión" de los nuesos políticos coles grandes infraestructures, ente les que citó'l túnel del Rañadoiru y l'autovía ente Ponferrada y Tinéu.

   Pela so parte, Riaño refirióse al cursu 'Ferramentas prá normalización llingüística del gallego-asturiano', primer fase de les trés de les que se va componer esta actividá. Ye, según el director de programación, un aición de "reciclaxe y anovamientu" del profesoráu de gallego-asturianu qu'imparte les sos enseñances na zona Navia-Eo, que tien por oxetu ofrecer nueves posibilidaes didáctiques.

   La otra novedá, el Cursu d'Especialización en Filoloxía Asturiana va destináu a filólogos n'Hispániques y Romániques, o bien titulaos na Especialidá de Filoloxía Asturiana, interesaos en "deprender principios básicos de la llignua asturiana" y "afondar nos sos conocimientos científicos".

   Los otros cursos ufiertaos son yá habituales d'esta actividá braniega de l'Academia, yá seyan añalmente, o cada dos años: l'Elemental y l'Avanzáu de Llingua Asturiana, el de Capacitación pa la Traducción, el de Capacitación pal Gallego-Asturianu, amás de'l de Presencia de la Llingua Asturiana n'Internet y el Xuegos y Tradiciones Populares na Enseñanza (de cara a la so inclusión nos currículos docentes).

BONA ACOYIDA

   La presidenta de l'Academia, Ana Cano, destacó la "bona acoyida" y la "aceutación" qu'ente'l públicu en xeneral tienen estos cursos, pa los qu'esti añu hai una matrícula d'unes 120 persones. De fechu, calcularon qu'en tola so historia pudieron facelos en total más de 5.000 persones dende la so primer edición.

   Riaño xustificó amás la realización de los mesmos nel conceyu d'Ibias por dos razones: la primera ye que la Escuela Hogar de Santantolín ye la de mayor capacidá de toles qu'esisten n'Asturies, y la segunda ye que ye demostrar "el compromisu de l'Academia de la Llingua col occidente asturianu".

   Cano recordó que, salvando los de Filoloxía y Ferramentas, el restu son abiertos pal públicu en xeneral, y nellos participen alumnos de toles edaes y formaciones. Destacó amás el "bon ambiente" que reina ente los participantes y ente la xente del pueblu, apuntando que'l personal del cursu (profesores, alumnos y organizadores, esti añu unes 150 persones) supón un aumentu del 50% de la población de Santantolín. Nesti sen, agradeció la collaboración tanto al Conceyu d'Ibias como a los sos habitantes.

   Riaño destacó tamién que, pese a qu'oficialmente yá se peslló la matrícula, tovía hai dalgunos cursos qu'almiten inscripciones.