El TSXA anula la carrera profesional d'Asturies pola so disconformidá a derechu

La sala de lo Contencioso Alministrativo del Tribunal Superior de Xusticia d'Asturies (TSXA) anuló la carrera profesional pa los emplegaos del Principáu por considerala disconforme a derechu, según recueye la sentencia xudicial a la que tuviere accesu Europa Press. La decisión xudicial afeuta a 19.000 trabayadores del sector públicu rexonal, toos menos los 16.000 de la sanidá que yá disfruten de la carrera profesional.

   Los sindicatos CC.OO, CSIF y Suatea recurrieren la resolcuión del 18 de mayu del 2009 dictada pola Conseyería d'Economía y Alministraciones Pública pola que se convocaba'l procedimientu de solicitú d'incorporación a la carrera y desarrollu profesional de los emplegaos públicos que presenten los sos servicios na Alministración del Principáu d'Asturies y los sos organismos públicos.

   El recursu taba fundamentáu en que la resolución impugnada regula un procedimientu de "incorporación a la carrera profesional de determinaos emplegaos públicos cuando nun existe un desarrollu llegal d'esa carrera".

   Según recueye'l "TSXA na so sentencia, la carrera profesional y el derechu a progresar reconozse nel artículu 14 de la Llei 7/2007, anque matiza que dicha llei "nun diseña una carrera profesional, sinón que fixa unos principios y modalidaes, unes pautes xenerales que nun permiten la so inmediata efeutividá".

   Sin embargu, el TSXA considera que "ye claro" que nel casu de la decisión de l'Alministración Autonómica, "nun tamos nel ámbitu de la carrera profesional previstu na Llei 7/2007 qu'amás nun taba vixente cuando s'entamó'l procedimientu alministrativu que dio llugar a l'actuación agora impugnada". Según el TSXA, "esa carrera profesional ta tovía güérfana del desarrollu llegal indispensable pa la so eficacia".

   Tampoco se trata, según el TSXA, de "otra carrera o conceutu distintu que pudiere tar finxada na normativa anterior, dao que nun yera posible'l pagu de cantidaes que nun correspuendan cola estructura retributiva normativamente prevista". Ye dicir, el pagu de cantidaes a cuenta que se contienen nel acuerdu impugnáu "nun tien tovía apoyu na aplicación de la Llei 7/2007, nin tampoco nel sistema anterior polo que nun cuenta con cobertoria llegal bastante".

   De la mesma manera, el Tribunal Superior considera que "nun ye posible regular de manera idéntica un réxime de carrera pa funcionarios públicos y personal llaboral qu'exixe non sólo procedimientos, sinón tamién cauces y instrumentos xurídicos distintos".

   "Nun sólo nun asocede que l'acuerdu alministrativu impugnáu nun contién un concretu y determináu modelu de carrera pa una y otra clase d'emplegaos públicos, llendándose a prever la perceición d'unes determinaes cantidaes si se dan ciertos requisitos o circunstancies que de nenguna manera puen asimilase a lo que sería una carrera profesional como conxuntu ordenáu d'oportunidaes d'ascensu, y espectatives d'ingresu profesional según los principos d'igualdá, méritu y capacidá, cola implantación d'intereses oxetivos y tresparentes d'evolución", recueye la resolución.

   Según el TSXA, el problema "alcúentrase non sólo na falta de regulación sustantiva d'una carrera que diere cobertoria y soporte a les cantidaes que se prevé abonar, sinón el distintu carácter formal y nel so casu material que la carrera profesional ha tener pa ún y otru emplegáu públicu".