DuPont va recortar 2.500 emplegos n'EE.UU y Europa, anque la compañía nun espera nengún impautu n'Asturies

La empresa química estaounidense DuPont va recortar unos 2.500 puestos de trabayu n'EE.UU y Europa Occidental, principalmente nos negocios rellacionaos cola industria del motor y de la construcción, pola cayida de la demanda rellacionada con estos sectores, informó güei la compañía.
   Amás, anunció que va haber una reducción de 4.000 contratistes a nivel mundial y l'asignación de 400 emplegaos a proyeutos especiales p'acelerar la reducción de capital circulante y costes operativos, dientro de programes de productividá yá existentes que se tán acelerando y que van proporcionar un recorte de costes fixos de 600 millones de dólares (unos 475 millones d'euros).
   Sobre España, la química sorrayó que "nun s'espera nengún impautu nes inversiones nin nos emplegaos del complexu industrial d'Asturies", mientres qu'estima que na Península Ibérica va tener un "impautu mínimu".
   "La baxada mundial nes ventes de los sectores de construcción, automoción y consumu en xeneral resultaron nuna baxada de producción industrial intensificando la necesidá de reducir inventarios na mayoría de les cadenes de suministru. Estes tres condiciones aceleren una fuerte baxada na demanda pal cuartu trimestre", indicó.
   La química destacó qu'adopta estes midíes "pa enfrentase a los actuales retos del mercáu y fortalecer la so competitividá nel 2009, incluyendo un enfoque continuu na maximización de lliquidez".
   DuPunt indicó qu'espera que'l fluxu de caxa (llinquidez) seya de 1.300 millones de dólares (unos 1.030 millones d'euros) como taba previsto, y s'incrementa hasta 2.500 millones de dólares (unos 1.982 millones d'euros) nel 2009 (el doble de lo anticipao nel 2008).
   Amás, la compañía señaló que prevé una cayida del 15% en ventes pal últimu trimestre del añu sobre les del cuartu trimestre del 2007 y anticipando que la crisis global va siguir nel 2009 estima una cayida nos beneficios por aición ente a 2,25 dólares y 2,75 dólares nel añu.
   Pal presente exerciciu, les previsiones feches nel tercer trimestre yeren de 3,25 a 3,30 dólares por aición, que se van ver rebaxaos en 0,20 y 0,30 dólares por aición polos resultaos esperaos demientres el cuartu trimestre.
   El presidente y conseyeru delegáu de Dupont, Charles O.Holliday Jr, indicó que la compañía ta xestionando cada faceta dientro del so control "pa maximizar lliquidez y asegurar que ta posicionando a llargu plazu p'asina beneficiase de les oportunidaes de crecimientu que van apaecer nos mercaos clave, especialmente naquellos onde los sos productos basaos en ciencia puean ser cabezaleros de mercáu".