UNA presenta vídeos de persones representatives del asturianismu pidiendo'l votu pal 7-X

|

Unidá Nacionalista Asturiana acaba de presentar una serie de videos nos que distintes persones del asturianismu piden el votu pa esta formación nacionalista de cara a les elecciones europees. Ente elles alcuéntrense Xosé Antón Fernández "Ambás", Fernando Ornosa o Tina Cuadriello.
 
A estos xúnense videos del conceyal saliente de la UNA en Carreño Santi Artime y el so sustitutu Xuan Rodríguez, amás de los númberos ún y dos de la llista, Daniel Fernández y Yolanda González, hasta completar un total de 15 persones.

Dende Unidá Nacionalista Asturiana afiten que "dientro de la estratexa de divulgación de les propuestes electorales d'UNA a traviés de les redes sociales, una opción que dende UNA valoróse como la más afayadiza nun contestu de polarización del votu y la probitú de recursos económicos" D'esti mou la formación asturiana incluyó na so canal de Youtube 15 vídeos grabaos por 15 persones representatives del mundu cultural, sindical y social asturianu.Nos vídeos, "d'unos 15 segundos de duración, los participantes espliquen porqué piden a los asturianos y asturianes el votu pa UNA'l próximu domingu".

Ente les persones qu'apaecen nos vídeos alcuéntrense d'elles perconocíes como'l "músicu, investigador y divulgador" Xosé Antón Fernández "Ambás" y  el "nomáu activista en defensa de la llingua y cultura asturianes" Fernando Ornosa. Tamién s'enxerta, ente otros y otres, la petición de votu a UNA de Xuan Carlos Fernández Castañón, que fora Secretariu Xeneral de la UNA nos años 90, y Xuan Rodríguez, conceyal candasín d'UNA que ta acabante tomar posesión de la so conceyalía, asina como Tina Cuadriello, "persona perconocía dientro del mundiu de la música folk n'Asturies, siendo parte del grupu Balandrán nos años 90, y anguaño dirixe'l grupu de pandereteres de Fitoria".

Pue accedese a tolos vídeos tanto dende la canal d'UNA en Youtube como na mesma páxina de la organización.

Comentarios

Que grande ye Ambás, y tolos y toles demás.
Nun país como Asturies nel qu'hai una dictadura del terror sobre too nel campu llaboral y tolo controla la FSA, que persones de perfil públicu s'atrevan a dar la cara por una opción que propón un cambiu tan claro d'Asturies ye p'agradece-yoslo. Y daquien como Ambás tien munchu meritu de verdá. Respetu y almiración ye lo que merecen.
A ver si esto d'UNA sal p'alantre, necesitamos yá un partíu asturianu. Y si sacais pocos votos nun vos desanimeis, esto hai qu'igualo pal futuru.

Contador Estadistiques