La Coordinadora Ecoloxista pide paralizar los sondeos na mina d'acebache d'Oles

La Coordinadora Ecoloxista ta acabante de solicitar al Gobiernu asturianu la paralización cautelar de los sondeos que se tan faciendo pa la mina d'acebache d'Oles (conceyu de Villaviciosa) por parte de la empresa Garaysam SL. La razón d'esta solicitú son "los incumplimientos constantes dende qu'entamaron de les condiciones ambientales impuestes pola Conseyería d'Industria y Empléu pal plan de llabores".

Según la CEA na autorización concedida pal proyectu de nueva apertura d'una mina de acebache na zona d'Oles, na que yá esistíen delles mines pequeñes subterránees abandonaes, imponía 4 condiciones ambiéntales: Respetar la viesca de la vega de la riega de los Molinos; Respetar la presencia de "felechu de cumbre" que ye una especie protexida; Evitar los vertíos líquidos na zona de sustancies contaminantes; y comunicar cualesquier actuación con antelación a la Conseyería de Mediu Ambiente.

Sicasí, la Coordinadroa Ecoloxista denuncia que "nun se respetó la viesva de la vega de la riega los Molinos, valtando árboles a esgaya, ensin autorización de la Confederación Hidrográfica del Cantábricu que yera desconocedora del proyectu a pesar d'afectar a la zona de so competencia". Añaden que se fixeron "movimientu de tierres nes pistes y na bocamina, qu'afectaron a los pocos exemplares protexíos de "felechu de cumbre", especie d'Interés Especial nel Catálogu Rexonal d'Especies Amenazaes de Flora nel Decretu 65/95 y que ta tamién recoyida como Especie d'Interés Comunitariu pola Directiva Hábitat 43/43/CEE".

Asimesmo afiten que "percíbese la presencia nel suelu de pequeños vertíos de productos petrolíferos" y que "nun se comunicó nada a la Conseyería de Mediu Ambiente, lo qu'amuesa una vez más la descoordinación de les alministraciones, porque Industria impón unes condiciones ambientales y Medie Ambiente, que lo tein de comprobar, nin lo sabe".