El Colexu de Mélicos diz que ye "inviable" la interrupción del embarazu n'hospitales públicos d'Asturies

|

La presidenta del Colexu de Mélicos d'Asturies, Carmen Rodríguez, considera "inviable" que los hospitales de la rede pública asturiana ofreza la prestación de la interrupción voluntaria del embarazu, dao que "tolos mélicos oxeten" a dicha práutica. Asina, en rellación col anteproyeutu de Llei de Salú Sexual y Reproductiva, y de la Interrupción Voluntaria del Embarazu, Carmen Rodríguez destacó que "tolos mélicos del serviciu de Salú del Principáu s'acoyeron a la oxeción de conciencia", y apuntó que nesti momentu nos hospitales públicos "nun se prautiquen albuertos".

   Poro, afirmó que n'Asturies, "difícilmente" va poder compaxinase'l derechu de les muyeres a la interrupción voluntaria del embarazu cola oxeción de conciencia "tanto moral como ética" de los profesionales, dao que "la formación mélica se dirixe a dar vida y salú, y penrbia del derechu de la paciente ta'l derechu a la vida del neñu". De la mesma manera, sobre la práutica d'interrupción d'embarazos nes clíniques privaes asturianes, Rodríguez comentó que "se trata de mélicos distintos".

   D'esta manera, mostróse firme y convencida de la "complexidá" de garantizar la prestación del serviciu na rede pública asturiana cola nueva llei, y recordó que "se llegó a trayer un mélicu de fuera que demientres unos meses lo fizo pero dempués s'acoyó tamién a la oxeción", a la vez qu'esclaró que "nengún Colexu obliga a los mélicos a oxetar", sinó que se trata de "una decisión en conciencia de los profesionales".

   Amás, Carmen Rodríguez considera un "error" y una midida "irracional" fixar nos 16 años la edá llegal p'albortar sin consentimientu paternu. La presidenta del Colexu de Mélicos d'Asturies argumenta que "si los pas son los responsables de la educación de los menores y a éstos nun-yos puen dar alcohol nin tabacu, cómo se-yos va permitir albortar sin la conocencia paterna, dao que los padres van ser los responsables últimos de lo que-y pase a los fíos".

   Nesti sen, entiende que l'anteproyeutu de llei pretende "quitar" la responsabilidá a los pas sobre los so fíos nuna práutica "que pue tener complicaciones y riesgu pa la salú física y psicolóxica de la menor", a la vez que calcó nel so refugu "total" a la regulación del albuertu.

Contador Estadistiques