L'Uviéu va enfrentase al Mallorca B na fase d'ascensu a 2ªB

|

Rematada yá la temporada regular na Tercera División del fútbol asturianu, cuatro son los equipos del país que opten al ascensu a Segunda División B y que yá conocen a los sos rivales: el Real Uviéu, el Candás, el Llanes y el Universidá d'Uviéu. Una categoría de la que baxó'l Marino de Lluanco y na que'l Sporting B ta xugándose la permanencia frente a Las Palmas B.

Los equipos asturianos tan empareyaos de la forma que vien darréu: Real Uviéu-Mallorca B, xugándose una plaza directa d'ascensu siendo'l próximu domingu la ida nel Carlos Tartiere y la vuelta na capital balear; Llanes-Alicante B; Portugalete-Universidá; y Tropezón de Cantabria-Candás. Estes eliminatories van xugase los díes 24 y 31 de mayu.

El trunfador de la eliminatoria ente l'Uviéu y el Mallorca B xugará en Segunda División B mientres que'l que pierda entá puede ascender si supera dos eliminatories, mientres qu'Universidá, Candás y Llanes deberán xugar trés pa poder ascender de categoría.

El Sporting B empató na ida de la permanencia

Per otru llau'l filial del Sporting empató nel partíu d'ida a cero goles frente a Las Palmas B en tierres canaries na fase de permanencia en Segunda División B, una categoría que l'otru representante asturianu, el Marino de Lluanco, perdió al quedar últimu na clasificación regular. El partíu de vuelta va disputase esti domingu nel Molinón.

Contador Estadistiques