El Sporting nun ye quién a salir del descensu

|

Venti minutos. Esi ye'l tiempu que duraron los asturianos xugando a fútbol. El restu del partíu fue un despropósitu futbolísticu que'l Sporting pagaría con una nueva derrota, pese a adelantase nel marcador énte un Almería que xugó con oficiu y disciplina. D'esti mou los asturianos queden con 34 puntos, a dos de la salvación y a falta de namás que tres xornaes pal final del campeonatu.

El partíu nun entamó mal pal equipu xixonés. Parecía que'l Sporting salía coles idees clares, conscientes de lo que se taben xugando, y el premiu llegó bien llueu por mor d'un remate de cabeza de Carmelo tres un centru de Jorge. Pero'l bon xuegu de los visitantes foi desinflándose poco a poco mientres que l'Almeria diba llegando cada vez con más peligru y amosando, una vegada más, les graves carencies defensives de los sportinguistes. Yá nel minutu 26 diba llegar l'empate, depúes d'un disparu nel área de Nieto que garro'l balón, llibre de marca, tres un rechace de cabeza de Gerard. A partir d'ehí'l partíu fue casi un monólogu de los andaluces.

La segunda parte ratificó les sensaciones de los últimos minutos de la primera. Un Sporting ensin idees clares, probe nel aspectu ofensivu y feble nel defensivu, frente a un Almería consciente yá de  les debiliades del rival. Un pase pel centru de la defensa de Negredo a Uche, que se plantó solu delantre de Cuéllar, vino a conseñar en forma de gol el dominiu local. Ehí acabó'l partíu pa los asturianos, incapaces yá de reponese énte un resultáu adversu. De fecho veíase más cerca'l terceru de los locales que' l'empate de los xixoneses. Y asina foi yá nel minutu 90 cuando Piatti batió a Cuéllar tres un pase de Negredo.

Una nueva derrota qu'asitia a los asturianos antepenúltimos, con 34 puntos, a dos de la salvación. El próximu partíu va ser nel Molinón frente al Málaga. Queden tres xornaes pal final y yá nun cabe les especulaciones: o'l Sporting gana o'l camín de Segunda puede yá nun tener vuelta.

Ficha técnica

Almería 3- Sporting de Xixón 1

Almería: Esteban; Michel (José Ortiz, m.56), Carlos García, Pellerano, Guilherme; Soriano, Juanito, Juanma Ortiz, Kalu Uche (Piatti, m.82); Nieto (Crusat, m.63) y Negredo.

Sporting: Cuéllar; Sastre, Gerard, Jorge, Jose Ángel; Diego Camacho, Matabuena, Carmelo (Kike Mateo, m.75), Diego Castro (Pedro, m.70); Míchel (Barral, m.59) y Bilic.

Árbitru: Pérez Burrull (cántabru). Sacó tarxetes amarielles a los locales Negredo, Carlos García, Soriano y Juanma Ortiz y a los visitantes Carmelo y Barral.

Goles: 0-1, M.06: Carmelo. 1-1, M.26: Nieto. 2-1, M.55: Uche. 3-1, M.90: Piatti.

Comentarios

 Dicir qu'esti Sporting xugó al fútbol venti minutos ye un actu de verdadera xenerosidá pola parte del redactor. L'equipu salió desquiciáu, murniu, ensin idees, ensin tener consciencia de la importancia del partíu (pue dicise que l'Almería paecía tar xugando pa mantenese).
Asina les coses llegó un gol de segunda xugada. Y hasta ehí. Lo que vieno dempués fueron engarradielles ente los propios xugadores del Sporting, pasotismu y un ridículu más en defensa propiu del Circu del Sol.
Prestábame tener fe, pero esti equipu ta muertu. Alón.

Lo peor nun ye perder: lo peor ye la falta de compromisu de munchos xugadores. Les declaraciones de Barral ayer postulándose como xugador del Almería ye pa que nun vuelva poner la camiseta del Sporting.
 
En realidá la categoría ye perfectamente salvable: l'Osasuna se supón que va perder col Sevilla y ye posible ganar al Málaga. Eso sí, col xuegu y l'actitú d'Almería nun se va a nenguna parte (bueno, si , a segunda).
 
Puxa Sporting y puxa Asturies
 

Rotura de fibres de Carmelo. Pa completar. 

Contador Estadistiques