Unidá Nacionalista Asturiana presenta la so candidatura a les elecciones europees

|

Unidá Nacionalista Asturiana ta acabante de dar anuncia de la so participación nes próximes elecciones europees del 7 de xunu. La formación nacionalista rexistró na Xunta Electoral Central la so candidatura en solitario, una llista que ta encabezada pol llicenciáu en Ciencies Polítiques Daniel Fernández Blanco siguida nos puestos 2 y 3 por Yolanda González Huergo y Fernando Ornosa. Según la UNA "a lo llargo de la campaña y la precampaña buscará l’apoyu de persones y colectivos que faigan un apueste porque nestes elecciones se sienta una voz asturiana que, dende una perpectiva d’esquierda, presente unes propuestes electorales non sucursalistes y centraes na defensa de los intereses d’Asturies".

La llista electoral d'Unidá Nacionalista Asturiana, que "conseñó la selmana pasada’l Conceyu Abiertu de la organización, ta encabezada por Daniel Fernández Blanco. Fernández Blanco nació en Xixón en 1978, y vive anguaño nesta mesma ciudá. Ye llicenciáu en CC. Polítiques y de la Alministración y fue becariu d’investigación na Universidá de Santiago de Compostela algamando’l diploma d’Estudios Avanzaos en Procesos Políticos Contemporáneos. Per otru llau cuenta con un máster n’Auditoría financiera y ye especialista en Derechu Tributariu y Llaboral pola universidá compostelana. Anguaño trabaya nun despachu profesional en temes d’asesoramientu. Responsable d’Attac en Santiago de Compostela, militó en dellos colectivos d’esquierda y a la vuelta a Asturies integróse n’UNA, formando parte anguaño de la Executiva Nacional, cuntando coles responsabilidaes d’Ayalguería de la organización y siendo amás voceru de la estaya de Vivienda.

Según anuncia la formación nacionalista "la númberu 2 de la llista ye la tamién miembro de la Xunta Executiva Nacional d’UNA la xixonesa Yolanda González Huergo. Huergo, técnica d’urbanismu y nacida en Xixón en 1971, ye llicenciada en Derechu pola Universidá d’Uviéu y funcionaria de l’alministración local. Huergo milita activamente dende los años 90 nel movimientu de vindicación llingüística y participa nos movimientos en defensa de los derechos humanos".

Mientres que'l puestu númberu 3 ocúpalu Fernando Ornosa, nacíu n’Uviéu onde habita "dende hai 50 años. Llicencióse en Xeografía pola Universidá d’Uviéu nel añu 1982, participando en distintos trabayos como xeógrafu y trabayando darréu d’ello 19 años na Facultá de Xeoloxía de la Universidá d’Uviéu. Dende l’añu 1978 podemos veceyalu a delles asociaciones de folclor y etnografía onde ocupó cargos de dirección y dirixó trabayos de campu de música tradicional asturiana. Dende 2001 ye’l responsable del Archivu de Música Tradicional del Muséu del Pueblu d’Asturies. Tien participao amás en bien d’organizaciones sociales y culturales y, dende 2004 a 2008, exerció como voceru del Conceyu Abiertu pola Oficialidá (CAO). En marzu de 2009 afíliase a UNA".

Amás, ente los 50 candidatos y candidates, la llista electoral d’UNA ta compuesta "por una amplia representación del mundu sindical, ecoloxista, cultural y asociativu asturianu". Bien llueu UNA va presentar en rueda de prensa la so candidatura y les llinies básiques del programa que la formación va proponer nestos comicios al Parlamentu européu, unes elecciones "que pese a los pilancos que presenten pa una fuerza como UNA, tienen la ventaya de que los asturianos y asturianes puedan votar a un partíu asturianu anque nun exerzan n’Asturies el so derechu al votu".
 

Contador Estadistiques