L'ALLA va presentar el númberu 100 de la revista "Lletres Asturianes"

|

L’Academia de la Llingua Asturiana presenta’l próximu martes día 31 de marzu, a les 12:00 hores, nel salon d’actos de la Obra Social y Cultural de Caxastur (C/ San Francisco, 4 - Uviéu) el númberu 100 del boletín oficial de la institución, la revista Lletres Asturianes.

Según conseña la institución académica, el primer númberu de Lletres Asturianes asoleyóse nel mes de mayu de 1981, acabante crease l’Academia, y "de magar entós y pasu ente pasu, la revista foi enanchándose y anovándose, algamando un llugar importante nel ámbitu de les revistes científiques españoles ya internacionales".

Pa l'ALLA "supón una gran satisfaición poder presentar esti simbólicu númberu 100 de Lletres Asturianes, que quier compartir col públicu llector de la revista, colos sos collaboradores, y con tola sociedá asturiana".

Nel actu de presentación intervendrán xunto a la Presidenta de l’Academia, y Direutora de la revista Dª Ana María Cano, D. José Vega, responsable de “Obra Social y Cultural” de Caxastur (entidá patrocinadora de la revista), D. Xosé Lluis García Arias, primer Presidente de l’ALLA y primer Direutor de Lletres Asturianes, y otros miembros del Conseyu de Redaición.

Contador Estadistiques