L’Sporting regala-y los tres puntos al Numancia

|

Los asturianos fixeron ún de los peores partíos d’esta temporada, regalando-y los tres puntos al que ye’l penúltimu clasificáu de la Lliga, el Numancia de Soria. Un penalti mui inocente y un error defensivu de traca tuvieron como consecuencia los dos goles numantinos y la derrota del Sporting, que vuelve a metese nuna situación a lo menos mui incómoda na tabla.

Derrota merecida d’un Sporting que nun supo construir el xuegu que-y dio les victories nes dos últimes xornaes. El Numancia, colo xusto, llevó tres puntos que-y dan fuelgu na llucha pola permanencia.

La primera parte foi de dominiu de los sorianos, que llevaron peligru nun par d’ocasiones a la portería de Lafuente gracies a un trallazu y a un remate de cabeza de Nagore que nun entraron de milagru. Pela so parte los asturianos nun fixeron una sola ocasión clara de gol nesta primer parte. Faltando 3 minutos pal descansu, llegaría’l penalti en contra de los xixoneses por un agarrón de Neru a Aranda. Barkero faría’l gol numantinu.

Na reanudación parecía que les coses podíen ponese de cara pal Sporting, por cuenta que tres un rechace del porteru local, Barral empataba’l partíu. Sicasí, 8 minutos depués, el Numancia devolvía a la realidá al Sporting por cuenta del gol de Goiria, que remató de cabeza tres un fallu defensivu increíble de Gerard, qu’intentó ceder de cabeza un balón a Lafuente, golpeando tan mal que fue a caer na cabeza del atacante numantinu. A partir d’ehí’l marcador nun se movió, y eso que los locales quedaríen con diez xugadores durante la última media hora pola espulsión de Moreno. Pero nin contra diez pudo l’Sporting llevar peligru real, y encima a falta de 5 minutos pal final Carmelo sería tamién espulsáu polo qu’equilibriu numéricu volvió al terrenu de xuegu.

En definitiva un mal partíu que dexa a los asturianos con 33 puntos, nel puestu decimuprimeru, pero a solo 4 puntos de los puestos de descensu.

Ficha Técnica

Numancia 2-Sporting de Xixón 1

Numancia: Juan Pablo; Juanra, Sergio Ortega, Sergio Boris, Cisma; Mario (Bellvis, min. 71), Nagore, Juan Carlos Moreno, Barkero; Goiria (Palacios, min. 65) y Aranda (Brit, min. 77).

Sporting: Lafuente; Raúl Cámara, Iván Hernández, Neru (Gerard, min. 46), José Ángel; Michel, Matabuena (Bilic, min. 73); Maldonado (Camacho, min. 65), Carmelo, Diego Castro; Barral.

Goles: 1-0, min. 43: Barkero, de penalti. 1-1, min 46, Barral. 2-1, min. 54, Goiria.

Árbitru: Pérez Lasa (vascu) Sacó tarxetes amarielles a Nagore,  Brit, Michel, Barral y José Angel y espulsó por doble amariella a Morena y Carmelo.

Comentarios

Ta claro qu'esti equipu nun espabila si nun tien el fueu en culu. Nun ye que lo diga yo, ye que lo diz hasta'l propiu Luis Morán. Lo malo ye que te quemes.
Pal añu que vien, con o sin Preciado, por favor: dos centrales titulares pa Primera, nun pido más.

Contador Estadistiques