Taller d'ilustración en Cuaña

L'artista gráficu Pablo Amargo, premiu nacional d'ilustración nel añu 2004, pondrá clase d'ilustración na Biblioteca Municipal de Cuaña'l próximu sábadu 4 d'abril a les 16.00 hores.
L'actividá ye de baldre y el propiu Ayuntamientu de Cuaña, organizador del taller, apurrirá los materiales necesarios pal desarrollu de la mesma.
Les persones interesaes tienen de ponese en contactu cola Biblioteca Municipal, asitiada n'Ortigueira, recibiendo nesi momentu'l testu a ilustrar: l'adaptación de la obra d'Eva Canel "El Esfoyón" al inglés, llibru que cuenta esoleyase bien llueu coles obres resultantes del taller.
Pablo Amargo entamó'l so llabor a mediaos de los años noventa, collaborando en prensa, publicidá y sobre manera ilustración de llibros. Nel ámbitu de los llibros n'asturianu rescamplen les sos collaboraciones cola Editorial Ámbitu en llibros de guapísima edición como la colección "Otru mundu ye posible" (Ámbitu, 2004) o "La Bola Infinita" (Ámbitu, 2000).
* Na semeya: Berta Piñán/Pablo Amargo, "El branu de Mirtya", Ámbitu, 2006.