La SGAE retruca al Ayuntamientu d'Uviéu que nun cobra pol 'folclore' tradicional sinón polos arreglos

|

La Sociedá Xeneral d'Autores matiza que los derechos d'autor que cobra pola interpretación de música del folclore tradicional ye en conceutu de les versiones y igües. Ye la respuesta de la SGAE  al conceyal d'Uviéu, José Suárez Arias-Cachero, que ta acabante quexase del cobru por pieces de música tradicional.
  

La SGAE diz alegrase pola iniciativa del Ayuntamientu d'Uviéu de "preservar y espadir el nuesu patrimoniu musical" y diz compartir "la idea de que'l meyor mou de defender la nuesa identidá cultural llega al traviés de la dinamización". Nesti sen, según la Sociedá d'Autores, munchos creadores "realicen un trabayu llaboriosu y dignu de mención d'adautación de la música tradicional: un llabor importantísimu que caltién vivu l'interés polos nuesos raigaños y que debe ser teníu en cuenta".
   La SGAE esplicó nun comunicáu que "si bien la música tradicional nel so estáu orixinal nun xenera derechos d'autor por ser de dominiu públicu, la gran mayoría de pieces que güei en día interpreten los grupos folclóricos y bandes de gaites son versiones adautaes o orquestaes y, como tal, rexistraes polos so arreglistes nesta entidá".
   Poro, la SAGE insistió en que nun cobra ingresos poles obres d'ámbitu tradicional, pero sí xestiona los derechos d'autor derivaos d'aquellos arreglos que son, normalmente, la base de lo que güei s'interpeta en bailes y pasucais.
   De la mesma manera, recordó que la entidá aconceyó, hai poco más d'una selmana, a les bandes de gaites d'Asturies cola presencia del conseyeru, José Ángel Hevia. "En tal cita punxo de manifiestu la importancia de los arreglos como principal factor dinamizador de la nuesa música folclórica".

Contador Estadistiques