Los sindicatos d'Arcelor afirmen que los trabayadores son los que paguen la crisis

|

Los representantes sindicales afirmaron ayeri que los resultaos  confirmen que la crisis "tán pagándola los trabayadores mentres los beneficios son pa los accionistes".

 
El representante de CC.OO, Ángel Díaz, afirmó en declaraciones a Europa Press, que los sindicatos yá esperaben que los resultaos fueren positivos, a pesar de la cayida de beneficios y de les consecuencies de la crisis, y insistió en que "los beneficios, como siempre son pa los aicionistes".
   "Como los beneficios xenérenlos en bona parte'l conxuntu de los emplegaos, polo menos pidimos que se note tamién nellos", dixo Díaz.
   Nos mesmos términos se manifestó'l representante d'USO, José Luis Porto, qu'esplicó que tres la presentación de resultaos los sindicatos nun puen más que reafirmase na so posición y exixir a la compañía que los beneficios "repercutan en toos, tanto nos trabayadores como nes instalaciones, que al final son los que lo xeneraron".
   Poro, igual que los representantes del restu de sindicatos, calcó en que na negociación del acuerdu marcu na que s'alcuentra ye "inconcebible" que la empresa proponga una conxelación salarial y aseguró que de nenguna manera van almitir que nun se siga alantre col programa de contratos relevu, porque "asegurar los emplegos ye la única forma de salir d'esta crisis".
   ArcelorMittal rexistró un beneficiu netu de 9.400 millones de dólares nel exerciciu 2008 (7.274 millones d'euros al cambiu actual), lo que supón un recorte del 9% sobre'l resultáu algamáu l'añu anterior, informó güei la compañía a la Comisión Nacional del Mercáu de Valores (CNMV).
   El presidente de la compañía, Lakshmi N. Mittal indicó que'l rindimientu d'ArcelorMittal foi "escelente" nel 2008, anque se vio "asolombráu" pol considerable amenorgamientu nel últimu trimestre del exerciciu.
   Tres la presentación de los resultaos, el grupu siderúrxicu ArcelorMittal espresó la so confianza en que la demanda d'aceru entame una "recuperación gradual" de magar el segundu semestre del añu, polo qu'almitió que, si esta meyora se concreta, podía evitase'l paru d'un altu fornu n'Asturies, asina como los despidos temporales anunciaos pa les plantes españoles.  

Contador Estadistiques