Selmana de les Lletres Asturianes

ArcelorMittal estudia aplicar dellos ERE y parar un fornu en Xixón p'amenorgar les consecuencies de la crisis

|

La direición de la empresa ArcelorMittal estudia aplicar espedientes de regulación d'emplegu (ERE) en toles plantes de productos Planos d'España y parar ún de los dos fornos altos de Xixón demientres unos meses ente'l segundu y tercer trimestre del añu ante la crisis qu'afeuta a la compañía. Asina lo esplicaron güei directivos de la Unidá Sur de Planos d'Europa a los representantes sindicales nun conceyu que caltuvieron en Madrid. Nel paquete de midíes que plantegó la compañía, según informó nuna nota prensa, figura tamién la conxelación de salarios.
 
Nun comunicáu, la compañía esplica que los efeutos de la crisis "tán resultando especialmente intensos pa dos de los principales clientes d'ArcelorMittal, como son el sector de la construcción y del automóvil". Recuerda, nel citáu comunicáu qu'en "España se vendieron un 28,1 por cientu menos de vehículos que nel 2007 lo que supón "la mayor cayida de la historia d'esti país".
 
El xigante siderúrxicu menciona de la mesma manera que nos últimos meses vino tomando midíes dirixíes a superar l'actual crisis pa que'l grupu "salga reforzáu y caltenga la so competitividá como cabezaleru mundial de la siderurxa".
 
Con esti oxetivu plantegó midíes como maximizar el consumu de materies primes propies, desarrollar les operaciones productives preferentemente en periodos nos que los precios de la enerxía eléctrica seyan más baxos, l'audatación de los trabayos de caltenimientu al nivel de producción real y la baxada de los costes d'estructura.
 
En cuanto a les midíes p'adoptar les instalaciones a la carga del trabayu, la compañía plantega que de caltenese la situación del mercáu como nesti momentu, el Grupu va parar ún de los sos altos fornos n'Asturies demientres unos meses na segunda metá del añu. De la mesma manera, la planta de Sestao va caltener una carga de trabayu inferior a los niveles normaes demientres los primeros seis meses del añu y demientres el primer semestre van parase les llinies d'Acabaos que tengan baxos niveles de carga de trabayu.
 
A cortu plazu se prevé la flexibilización de los tiempos de trabayu, adelantu de vacaciones y xornada irregular, midíes que yá taben aplicando nel casu de les plantes d'Asturies. La empresa prevé de la mesma manera reasignar el personal propiu a otres funciones y cuando diches midíes resulten escases pa facer frente a los baxos niveles d'actividá y si la situación de mercáu continúa na mesma llinia, "va recurrise a regulaciones temporales d'emplegu". Na nota s'almite que "dada la situación del primer semestre del 2009, toles  plantes de Planos d'España van vese obligaes a aplicar esta midida".

Contador Estadistiques